Konkret.az saytına istinadən ain.az xəbər verir.
“ABŞ və İran arasında mümkün hərbi toqquşma ehtimalının gündəmə gəlməsi neft bazarlarında dərhal risk qavrayışını yüksəldir. Xüsusilə, Hörmüz boğazı faktorunun yenidən müzakirəyə açılması bazarlarda psixoloji təzyiq yaradır, çünki qlobal neft daşımalarının əhəmiyyətli hissəsi məhz bu marşrutdan keçir”.
Bu fikirləri politoloq Züriyyə Qarayeva KONKRET.az-a açıqlamasında səsləndirib.
“Hətta əməliyyatın məhdud və qısa müddətli olacağı ehtimalı belə treyderlər üçün qiymət artımı siqnalı kimi oxunur. Bu səbəbdən neftin qiymətində real təklif kəsintisi baş verməsə belə, gözlənti və spekulyativ faktorlar üzərindən sürətli bahalaşma dalğası yarana bilər”.
Politoloq qeyd edir ki, enerji qiymətlərindəki artım təkcə neftlə məhdudlaşmaya bilər.
“Qaz bazarları, xüsusilə Avropa üçün alternativ mənbələrin məhdud olduğu bir dövrdə, Yaxın Şərqdə gərginliyin dərinləşməsi əlavə təzyiq yarada bilər. Bu vəziyyət inflyasiyanı yenidən sürətləndirə, mərkəzi bankların faiz siyasətini sərtləşdirməyə məcbur edə və qlobal iqtisadi bərpanı zəiflədər. Yəni mümkün hərbi toqquşma təkcə regional təhlükəsizlik məsələsi deyil, enerji bazarları üzərindən bütün dünya iqtisadiyyatına təsir göstərə biləcək ciddi bir risk amilidir”.
Aynurə İsmayıl
KONKRET.az
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
