ABŞ-da yerləşən Strateji və Beynəlxalq Araşdırmalar Mərkəzi (CSIS) müharibənin hazırkı itkiləri ilə bağlı əhatəli hesabat təqdim edib. ABŞ və Böyük Britaniya kəşfiyyat məlumatlarına əsaslanan araşdırma, İkinci Dünya Müharibəsindən bəri Avropa torpaqlarında görülən ən ağır hərbi itkiləri təsdiqləyir.
Hafta.az yazır ki, CSIS-in araşdırmasına görə, Rusiyanın Ukraynaya genişmiqyaslı işğalı dördüncü ilinə qədəm qoyarkən, hər iki tərəfdə ümumi insan itkisi 2 milyona yaxınlaşa bilər.
CSIS bildirib ki, Rusiyanın ümumi hərbi itkiləri təxminən 1,2 milyon olaraq qiymətləndirilir. Bu rəqəmlərə ölənlər, ağır yaralananlar, əlil olanlar və itkin düşənlər daxildir.
CSIS-in Rusiya üçün itkilərlə bağlı təxminləri əsasən Ukrayna Baş Qərargahının məlumatları ilə üst-üstə düşür. Ukrayna Baş Qərargahının 27 yanvar səhəri açıqladığı rəqəmlərə görə, Rusiya ordusunun ümumi itkiləri 1 milyon 235 min 880 nəfərə çatıb. Bu rəqəmə yalnız həlak olanlar və ağır yaralananlar deyil, həm də müalicədən sonra cəbhəyə qayıda bilən əsgərlər daxildir.
CSIS Ukrayna tərəfindəki ümumi itkilərin təxminən 600 min olduğunu təxmin edir. Ukrayna hökuməti müharibə boyunca rəsmi rəqəmləri açıqlamaqdan yayınsa da, Prezident Volodymyr Zelensky 2025-ci ilin əvvəlində “NBC News”a verdiyi müsahibədə 46 mindən çox Ukrayna əsgərinin rus işğalçılarına qarşı döyüşlərdə həyatını itirdiyini və təxminən 380 min əsgərin yaralandığını bildirib.
Ukrayna Baş Qərargah rəisi Aleksandr Sırski 13 yanvarda 2025-ci ilə qədər şəxsi heyət itkilərini 13 faiz azaltmağı bacardıqlarını açıqlayıb, lakin yenilənmiş ümumi rəqəmi açıqlamayıb.
Digər tərəfdən, tədqiqatın ən təəccüblü nəticələrindən biri Rusiya ordusunun yerdəki irəliləmə sürəti ilə yaşadığı şəxsi heyət itkiləri arasındakı dərin fərqdir. Analitiklər müəyyən ediblər ki, Rusiya hücumunun sürəti 20-ci əsrin demək olar ki, bütün əsas hərbi əməliyyatlarından daha yavaşdır. Hesabata görə, Moskva 2024-cü ilin yanvar ayından bəri Ukrayna ərazisinin yalnız 1,5 faizini ələ keçirə bilib. Bunun əksinə olaraq, insan itkisi müharibənin başlanğıcından bəri ən yüksək həddə çatıb. Hesabatda Rusiya ordusunun təkcə 2025-ci ildə təxminən 415 min əsgər itirdiyi bildirilir və əlavə olunur: "Bu rəqəmlər fövqəladədir. İkinci Dünya Müharibəsindən bəri heç bir böyük güc heç bir müharibədə bu qədər itki və ya ölüm yaşamayıb".
Ekspertlər bu böyük itkiləri zəif taktiki idarəetmə, qeyri-kafi hərbi təlim, şəxsi heyət arasında əhval-ruhiyyənin aşağı olması və Ukraynanın səmərəsiz müdafiə strategiyaları ilə əlaqələndirirlər. Analitiklər hesablayırlar ki, münaqişənin hazırkı sürəti davam edərsə, 2026-cı ilin yazına qədər hər iki tərəfin ümumi itkiləri 2 milyona çata bilər.
