Vyanada keçiriləcək təcili iclasda kritik infrastruktura hücumların nəticələri müzakirə olunacaq...
Poliqon xəbər verir ki, Bloomberg-in məlumatına görə, Ukraynada nüvə təhlükəsizliyi ilə bağlı risklərin artması fonunda Beynəlxalq Atom Enerjisi Agentliyinin (MAQATE) yaxın vaxtlarda Vyanada fövqəladə iclası keçiriləcək. Bildirilir ki, görüşdə diplomatlar kritik əhəmiyyətli infrastruktura endirilən zərbələrin mümkün nəticələrini müzakirə edəcəklər.
Məqalədə vurğulanır ki, atom energetikası, fosil yanacaqla işləyən və ya bərpa olunan enerji mənbələrinə əsaslanan elektrik stansiyalarından fərqli olaraq təhlükəsizlik sistemlərinin normal fəaliyyəti üçün daimi elektrik təchizatına ehtiyac duyur. Elektrik enerjisinin kəsilməsi və ya uzunmüddətli fasilələr yaranarsa, reaktorun aktiv zonasındakı yanacağın həddindən artıq qızması riski artır. Bu isə nəticədə təhlükəli radiasiya sızmasına səbəb ola bilər.
Niderlandın MAQATE-dəki səfiri Piter Potman bildirib ki, Ukraynadakı atom elektrik stansiyaları ilə bağlı nüvə təhlükəsizliyi və mühafizəsi sahəsində “əhəmiyyətli və getdikcə artan risklər” mövcuddur. Onun təşəbbüsü ilə çağırılan Agentliyin Şurasının növbədənkənar iclasında məhz bu risklərin aktuallığı və yaranan təhlükəli ssenarilər ətrafında müzakirələrin aparılacağı gözlənilir.
Səfirin sözlərinə görə, nüvə qəzası ehtimalı “sözün əsl mənasında reallığa çevrilməyin astanasındadır”. Bu açıqlama, Ukraynada enerji infrastrukturuna yönəlmiş hücumların davam etməsi fonunda beynəlxalq ictimaiyyətin narahatlığının daha da artdığını göstərir.
Ekspertlər hesab edirlər ki, atom elektrik stansiyalarının təhlükəsizlik sistemlərinin işlək vəziyyətdə saxlanılması üçün elektrik təchizatı həyati əhəmiyyət daşıyır. Belə obyektlərdə nasosların, soyutma mexanizmlərinin və digər kritik sistemlərin dayanmaması nüvə təhlükəsizliyinin əsas şərtlərindən biridir. Buna görə də, enerji şəbəkəsinin sıradan çıxması və ya stansiyaların xarici enerji mənbələrindən təcrid olunması ağır nəticələr doğura bilər.
Poliqon.info
