Ukrayna məsələsi ilə bağlı 1 fevralda Əbu-Dabidə keçirilməsi planlaşdırılan görüş hələ də qüvvədədir və ləğv edilməyib. Bu barədə TASS öz mənbəyinə istinadən məlumat verir.
Bir gün əvvəl Ukrayna Prezidenti Vladimir Zelenski Birləşmiş Ərəb Əmirliklərinin (BƏƏ) paytaxtında Rusiya və Ukrayna nümayəndələri arasında danışıqların ABŞ və İran arasındakı münasibətlərdə artan gərginlik səbəbindən təxirə salına biləcəyini irəli sürmüşdü.
23 və 24 yanvarda Əbu-Dabidə Rusiya Federasiyası, ABŞ və Ukrayna arasında üçtərəfli danışıqlar baş tutub. Rusiya nümayəndə heyətinə Rusiya Federasiyası Silahlı Qüvvələri Baş Qərargahının Baş Kəşfiyyat İdarəsinin rəisi İqor Kostyukov rəhbərlik edirdi. Üçtərəfli işçi qrupun Ukrayna hissəsinin başında Milli Təhlükəsizlik və Müdafiə Şurasının katibi Rüstəm Umerov idi. Rusiya Federasiyası Prezidentinin mətbuat katibi Dmitri Peskov yanvarın 28-də mətbuata bildirib ki, Əbu-Dabidə Ukrayna münaqişəsinin həlli ilə bağlı danışıqların fevralın 1-də bərpası planlaşdırılır.
