Bizimyol portalından verilən məlumata əsasən, ain.az bildirir.
Türkiyə Prezidenti Rəcəb Tayyib Ərdoğan ABŞ və İranın mövcud məsələləri diplomatik yolla həll etmək iradəsini qoruduğunu və danışıqlar prosesinin kəsilmədiyini bildirib.
Bizimyol.info xəbər verir ki, bu barədə Ərdoğan Misirdən qayıdarkən jurnalistlərlə söhbətində qeyd edib.
"Regionun yeni münaqişə və xaosa sürüklənməsinin qarşısını almaq üçün ABŞ və İran arasındakı gərginliyi azaltmaq üçün əlimizdən gələni edirik. İrana hərbi müdaxilə perspektivinə qarşı olduğumuzu açıq şəkildə bildirmişik və bunu həmkarlarımıza çatdırmışıq. Bu məqamda hər iki tərəfin diplomatiyaya qapı açmağa hazır olduğunu görürəm və bu, müsbət haldır. Həll yolu qarşıdurmada deyil, ortaq məxrəc tapmaqda və danışıqlardadır. Bu proses aktivdir və kəsilməyib. Dialoq və diplomatiya üçün əsas açıq qalır", - deyə Türkiyə Prezidenti bildirib.
O, həmçinin "aşağı səviyyəli görüşlərdə irəliləyiş əldə edildikdən sonra ABŞ və İranın liderlik səviyyəsində danışıqlarının" faydalı olacağı fikrini ifadə edib.
Ərdoğanın sözlərinə görə, Türkiyə ABŞ və İran arasında gərginliyi azaltmaq və bölgədə yeni bir münaqişənin qarşısını almaq üçün hər cür səy göstərir.
"Türkiyə Qəzza sülh planının düzgün həyata keçirilməsində, onun yenidən qurulmasında, bölgədə sülh və sabitliyin təmin edilməsində fəal rol oynayacaq. Qəzzadakı fələstinli qardaşlarımızın layiqli bir gələcək və davamlı sülh tapmasını istəyirik. Biz kağız üzərində deyil, praktikada sülhü müdafiə edirik", - deyə prezident qeyd edib.
Ərdoğan əlavə edib ki, "Atəşkəsin təmin edilməsi, humanitar yardımın göstərilməsi və Qəzzanın mülki əhalisinin qorunması üçün mümkün qədər tez tədbirlər görülməlidir. Türkiyə bunu təmin etmək üçün hər cür səy göstərir".
Qadir, Bizimyol.info
Daha ətraflı məlumat və yeniliklər üçün ain.az saytını izləyin.
