Qazaxıstan artan enerji ehtiyaclarını ödəmək məqsədilə ikinci Atom Elektrik Stansiyası (AES) üçün yer seçimini başa çatdırıb. Birinci stansiya kimi, bu yeni qurğu da ölkənin cənubunda, ən əhəmiyyətli enerji çatışmazlığı olan bölgədə inşa ediləcək.
Hafta.az yazır ki, ilk AES-i tikən Rusiyanın Rosatom şirkətindən fərqli olaraq, ikinci (və bəlkə də üçüncü) stansiyanın tikintisi üçün Çin şirkəti CNNC ilə razılaşma əldə edilib. Lakin Qazaxıstan rəsmilərinin açıqlamalarındakı qeyri-müəyyənlik layihənin necə davam edəcəyi ilə bağlı suallar doğurur: Çin şirkəti onu təkbaşına tikəcək, yoxsa konsorsium yaradılacaq? Energetika Nazirliyi CNNC-ni yalnız potensial tərəfdaş kimi təsvir edir.
Üçüncü AES-lə bağlı da oxşar qarışıqlıq mövcuddur. Qazaxıstan Baş nazirinin müavini Roman Sklyar Çin şirkətinin də bu layihənin podratçısı olacağını bildirsə də, Energetika Nazirliyi danışıqların hələ də davam etdiyini açıqlayıb. Müxtəlif qurumların ziddiyyətli açıqlamaları prosesin ətrafındakı qeyri-müəyyənliyi vurğulayır.
Qazaxıstanda elektrik enerjisi istehlakı sürətlə artdıqca, infrastrukturun aşınması problemləri daha da artırır. Elektrik stansiyalarının tikintisindəki gecikmə siyasi səbəblərlə izah oluna bilsə də, bu, iqtisadiyyata müsbət töhfə vermir. Qazaxıstan enerji ehtiyaclarını ödəmək üçün nüvə elektrik stansiyalarının tikintisini sürətləndirməyə çalışdığı üçün layihə tərəfdaşlığı və prosesləri ilə bağlı aydınlığa ehtiyac duyur. Əks təqdirdə, enerji kəsirinin ölkə iqtisadiyyatına təzyiqi artmaqda davam edəcək.
