2027-ci ildən etibarən tam (11 illik) orta təhsil səviyyəsində təhsil alan şagirdlərin yekun attestasiyasında xarici dil fənləri üzrə tətbiq olunacaq yeni imtahan modeli ictimai müzakirəyə çıxarılıb.Təklif olunan modelə əsasən dinləmə və oxu bacarıqları qapalı tipli test tapşırıqları ilə, yazı bacarığı isə minimum 100 söz həcmində yazılı iş vasitəsilə yoxlanılacaq.
Yeni imtahan modelində dinləmə, oxu, leksik-qrammatik və yazı bacarıqları üzrə tapşırıqların hər biri neçə balla qiymətləndiriləcək, xüsusilə ən az 100 söz həcmində yazı tapşırığının yekun nəticədə payı necə müəyyən olunacaq və bal bölgüsü zamanı bacarıqlar arasında hansı balans gözlənilir?
Mövzu ilə bağlı AzEdu.az Dövlət İmtahan Mərkəzinə sorğu ünvanlayıb.
Mərkəzdən sorğumuza cavab olaraq bildirilib ki, 2027-ci ildə tətbiqi nəzərdə tutulan tam (11 illik) orta təhsil səviyyəsi üzrə buraxılış imtahanında (qəbul imtahanının birinci mərhələsi) xarici dil fənləri üzrə test blokunda verilmiş fikir və ya mövzu əsasında ən az 100 sözdən ibarət kiçikhəcmli yazı işi yazmaq tələb olunan tapşırıq markerlər tərəfindən meyarlar əsasında 5 ballıq şkalada qiymətləndiriləcək:
"A meyarında tapşırığın yerinə yetirilməsi nəzərə alınacaq. Yazı işinin mövzuya uyğunluğu, tələb olunan həcmə əməl edilməsi, irəli sürülən əsas fikrin aydın şəkildə ifadə olunması, dəstəkləyici cümlələrin və yekun fikrin mövcudluğu qiymətləndiriləcək. Bu alt meyar üzrə maksimum 1 bal almaq mümkündür.
B meyarında mövzunun əhatə edilməsi və məntiqi ardıcıllıq nəzərə alınacaq. Fikirlərin ardıcıl təqdim olunması, həm müsbət (lehinə), həm mənfi (əleyhinə) tərəflərin qeyd olunması, cümlələr arasında məntiqi əlaqənin qorunması və uyğun birləşdirici vasitələrdən istifadə səviyyəsi qiymətləndiriləcək. Bu alt meyar üzrə maksimum bal 2-dir.
C meyarında qrammatik qaydalara əməl olunma nəzərə alınacaq. Müxtəlif cümlə strukturlarından düzgün istifadə edilməsi və qrammatik səhvlərin məzmunun anlaşılmasına mane olmaması əsas götürüləcəkdir. Bu alt meyar üzrə maksimum bal 1-dir.
D meyarında söz ehtiyatının müxtəlifliyi və işlədilməsi nəzərə alınacaqdır. Mövzuya uyğun sözlərin yerində istifadəsi, leksik müxtəliflik və yersiz təkrarlardan qaçınılması qiymətləndiriləcəkdir. Bu alt meyar üzrə maksimum bal 1-dir.
Yol verilən leksik və qrammatik səhvlər yekun bala təsir edir.Beləliklə iştirakçılar bu tapşırıq üzrə maksimal 5 bal toplaya bilərlər. Nəticələr daha sonra digər tapşırıqlar üzrə toplanılan ballarla bir yerdə xüsusi hesablanma düsturu vasitəsilə həmişəki 100 ballıq qiymətləndirmə şkalasına uyğunlaşdırılır və fənn üzrə yekun bal çıxarılır".
