Cənubi Koreyada Şimali Koreya lideri Kim Çen Inın tez-tez varis müzakirələri ilə gündəmə gələn qızı Kim Ju-eni rəsmən öz xələfi elan etmək mərhələsinə qədəm qoyduğuna dair kəşfiyyat məlumatları əldə edilib.
"Yonhap" agentliyinin məlumatına görə, Cənubi Koreya Milli Assambleyasının Kəşfiyyat Komitəsinin iki deputatı Cənubi Koreya Milli Kəşfiyyat Xidmətinin (NIS) Şimali Koreya ilə bağlı son qiymətləndirmələrini jurnalistlərlə bölüşüb.
Məlumata əsasən, müxtəlif tədbirlərdə mütəmadi olaraq atasının yanında görünməsi ilə diqqət çəkən Ju-enin son vaxtlar bəzi dövlət siyasətləri haqqında fikirlərini bildirdiyinə dair işarələr aşkar edilib. Aparılan araşdırmalar nəticəsində Ju-enin artıq Şimali Koreya lideri Kimin rəsmi xələfi kimi təyin olunma ərəfəsində olduğu qənaətinə gəlinib.
Həmçinin qeyd olunub ki, Ju-enin Koreya Fəhlə Partiyasının bu ayın sonunda keçirilməsi gözlənilən və 5 illik inkişaf planının müəyyən ediləcəyi 9-cu Qurultayında iştirak edib-etməyəcəyi yaxından izləniləcək.
NIS-in hesabatında həmçinin bildirilir ki, Şimali Koreya son vaxtlar ABŞ Prezidenti Donald Trampı təhrik etməmək üçün qitələrarası ballistik raket sınaqlarından yayınıb. Bununla yanaşı, Rusiyanın Kursk vilayətində Ukrayna qoşunlarına qarşı 11 minə yaxın Şimali Koreya əsgərinin yerləşdirildiyi nəticəsinə gəlinib.
Şimali Koreya liderinin qızı və varis müzakirələri
Şimali Koreya lideri Kim Çen Inın qızı Kim Ju-e 2022-ci ildə dövlət mediasında ilk dəfə görünəndən bəri hərbi paradlar və raket sınaqları da daxil olmaqla bir çox tədbirdə atasını müşayiət etməsi ilə diqqət mərkəzindədir.
NIS 2024-cü ilin yanvar ayındakı qiymətləndirməsində 2013-cü il təvəllüdlü olduğu təxmin edilən Ju-eni Şimali Koreyanın ən real xələfi kimi xarakterizə edib. Kim Çen Inın yanvarın 1-də rəmzi əhəmiyyət kəsb edən ailə abidəsini qızı ilə birlikdə ziyarət etməsi onun qızını öz varisi kimi gördüyünə dair müzakirələri yenidən canlandırıb.
