Böyük Britaniyada məişət zorakılığına məruz qalan qadınların intihara sürüklənməsi halları rəsmi statistikada çox az əks olunur və bir çox işlər polis tərəfindən lazımi qaydada araşdırılmır.
Ekspertlər bu vəziyyəti “milli qalmaqal” kimi qiymətləndirirlər.Məlumatlara görə, zorakı münasibətdə olan qadının partnyoru tərəfindən öldürülməkdənsə, intihar etmə ehtimalı daha yüksəkdir. Lakin aparılan araşdırmalar göstərir ki, rəsmi statistika real halların cəmi 6,5%-ni əhatə edə bilər.
"Cebheinfo.az" xəbər verir ki, Milli Polis Rəisləri Şurasının (NPCC) rəhbərlik etdiyi Məişət Cinayətləri Layihəsinə əsasən, 2024-cü ildə məişət zorakılığı ilə əlaqəli 98 şübhəli intihar, 80 intim partnyor tərəfindən qətl qeydə alınıb. Kent bölgəsində aparılan araşdırma isə 2018–2024-cü illər arasında baş verən şübhəli intiharların təxminən üçdə birinin məişət zorakılığı qurbanları olduğunu göstərib.
Əgər bu göstərici ölkə üzrə də eynidirsə, hər il təxminən 1500 qadının məişət zorakılığı səbəbindən intihar etdiyi ehtimal olunur. Bu isə əvvəlki hesablamalardan 15 dəfə çoxdur.
Araşdırmaya rəhbərlik edən Kent Universitetinin akademiki Tim Vudhaus bildirib ki, problemin miqyası milli səviyyədə xüsusi işçi qrupunun yaradılmasını zəruri edir. Onun sözlərinə görə, mövcud statistika real vəziyyəti tam əks etdirmir və sərt meyarlar səbəbindən çox sayda hal qeydə alınmır.
Hüquq müdafiəçiləri qeyd edirlər ki, Böyük Britaniyada məişət zorakılığından sonra intihar edən qadının ölümü ilə bağlı qəsdən adam öldürmə maddəsi üzrə indiyədək cəmi bir nəfər məhkum olunub. Bir çox hallarda prokurorlar cinayət tərkibi görmədiklərini bildirir, nəticədə zorakılıq və məcburi nəzarət faktları üzrə istintaq aparılmır.
Fəallar məişət zorakılığı şübhəsi olan bütün intiharların ilkin mərhələdə potensial qətl kimi araşdırılmasını, sübutların düzgün toplanmasını və qurbanların vaxtında qorunmasını tələb edirlər.
“The Guardian” qəzeti məişət zorakılığı nəticəsində intihar etmiş şəxslərin siyahısını dərc edərək problemin miqyasını ictimaiyyətə çatdırıb. Bəzi hallarda məhkəmə-tibb ekspertizası ölümləri qanunsuz qətl kimi qiymətləndirsə də, prokurorluq kifayət qədər sübut olmadığını əsas gətirərək ittiham irəli sürmür.
Hüquq müdafiəçiləri və vəkillər hesab edirlər ki, polis və prokurorluq orqanlarında məişət zorakılığının təsirləri barədə yetərli anlayış olmadıqda, ciddi səhvlər baş verir və bu səhvlər ölümcül nəticələrə gətirib çıxara bilər.
Kampaniya qrupları yeni qanunvericilik təşəbbüsləri ilə çıxış edərək məişət zorakılığı ilə əlaqəli intiharların ayrıca hüquqi çərçivədə qiymətləndirilməsini istəyirlər. Onların fikrincə, bu cür dəyişikliklər həm istintaq prosesini gücləndirər, həm də ədalətə çıxışı asanlaşdırar.
Zərərçəkmiş ailələr isə illərdir ədalət uğrunda mübarizə apardıqlarını bildirərək dövlət qurumlarından real və sistemli dəyişiklik tələb edirlər.
