Mənbələr bildirir ki, məhdudiyyət 1 aprel tarixindən qüvvəyə minəcək...
Poliqon xəbər verir ki, “Baza” telegram kanalının yaydığı məlumata görə, Rusiyada “Telegram” mesencerinin 1 aprel tarixindən etibarən tam şəkildə bloklanması planlaşdırılır. İddialara əsasən, bu tarixdən başlayaraq ölkənin rabitə və informasiya texnologiyaları sahəsinə nəzarət edən qurumu – Roskomnadzor mesencerin fəaliyyətinə qarşı total məhdudlaşdırma tədbirlərinə start verəcək.
Mənbələrin məlumatına görə, tətbiq olunacaq bloklama mexanizmi daha əvvəl Instagram və Facebook platformalarına qarşı tətbiq edilən sxemə bənzər olacaq. Bildirilir ki, məhdudiyyət Rusiya ərazisinin bütün hissələrini əhatə edəcək və tətbiq nə mobil şəbəkələr, nə də sabit internet provayderləri vasitəsilə açılmayacaq.
Hazırda rəsmi qurumlar tərəfindən məsələ ilə bağlı açıq təsdiq verilməyib. Bununla belə, Rusiyada internet resurslarına nəzarət mexanizmlərinin son illərdə daha da sərtləşdirildiyi məlumdur. Qeyd edək ki, Telegram platforması ölkədə həm fərdi istifadəçilər, həm də media qurumları və ictimai-siyasi aktorlar tərəfindən geniş istifadə olunur.
Mümkün bloklanma qərarı informasiya mühitinə və rəqəmsal kommunikasiya imkanlarına ciddi təsir göstərə bilər. Ekspertlər hesab edirlər ki, belə bir addım alternativ platformalara keçidi sürətləndirə və VPN xidmətlərinə tələbatı artıra bilər.
Məsələ ilə bağlı rəsmi açıqlamanın verilməsi gözlənilir.
Poliqon.info
