ain.az bildirir, Adelet.az portalına istinadən.
“Rusiya Ermənistana təzyiqlərini artırır. Gürcüstan hökuməti isə 100-ə yaxın Ermənistan yük maşınının Rusiyaya keçidinə icazə vermir. Bu addım təkcə texniki gömrük məsələsi deyil, həm də siyasi mesaj xarakteri daşıyır. Rəsmi Tiflis Azərbaycan–Ermənistan normallaşma prosesinin sürətlənməsi fonunda regiondakı tranzit rolunun zəifləməsindən narahatdır”.
Adalet.az xəbər verir ki, bunu politoloq Məhəmməd Əsədullazadə deyib.
Politoloqun sözlərinə görə, əgər Bakı və İrəvan arasında yekun sülh sazişi imzalanarsa, alternativ nəqliyyat marşrutlarının açılması Gürcüstanın strateji tranzit üstünlüyünü azalda bilər:
“Bu baxımdan, həm Rusiya, həm də Gürcüstan müəyyən məqamlarda Ermənistana təzyiq mexanizmlərində ortaq maraq nümayiş etdirə bilər. Seçkilər yaxınlaşdıqca Gürcüstan hakimiyyətinin Ermənistanda daxili narazılığı artıracaq addımlara üstünlük verməsi istisna deyil. Çünki Nikol Paşinyanın hakimiyyətdə qalması Tiflisdəki mövcud siyasi kursla tam uzlaşmır. Bidzina İvanaşvilinin təsiri altında olan “Gürcü Arzusu” hökuməti Rusiya ilə münasibətləri normallaşdırmağa çalışarkən Qərblə müəyyən konfrontasiya xəttinə daxil olub. Eyni zamanda, Qərbin Tiflisdəki bəzi təsisatlarını Ermənistana yönəltməsi və buradan Gürcüstan vətəndaş cəmiyyəti ilə işləməsi də rəsmi Tiflisi narahat edən amillər sırasındadır. Gürcüstanın Rusiya ilə paralel şəkildə Ermənistana təzyiq etməsi regionda dəyişən geosiyasi reallıqlara uyğunlaşma çətinliyindən qaynaqlanır. Gürcüstan gömrük rəsmiləri Ermənistan daşıyıcılarına Azərbaycan ərazisi üzərindən Rusiyaya çıxışı tövsiyə edirlər. Bunu rişxəndlə desələr də, regionda logistika və siyasi balansın yenidən formalaşdığını göstərir”.
Vasif ƏLİHÜSEYN
Daha ətraflı məlumat və yeniliklər üçün ain.az saytını izləyin.
