ABŞ administrasiyası İranın nüvə proqramı ətrafında yaranmış problemin diplomatik yolla həlli üçün, o cümlədən Cenevrədə təmasları davam etdirməyə hazırdır, lakin Vaşinqtonun alternativ ssenariləri də var. Vətəninfo.az xəbər verir ki, bu barədə ABŞ-ın vitse-prezidenti Cey Di Vens bildirib.
Onun sözlərinə görə, prezident Donald Tamp danışıqları davam etdirmək və “mümkün olan ən yaxşı razılaşmanı əldə etmək” məqsədilə iki əsas nümayəndəsini Genevaya göndərir.
“Prinsip sadədir: İran bizim üçün problem yarada biləcək nüvə silahına sahib ola bilməz. Biz onların məhz buna cəhd etdiklərinə dair sübutlar görmüşük. Prezident bu problemi diplomatik yolla həll etmək istəyir. Lakin onun başqa variantları da var”, – deyə Vens vurğulayıb.
Yanvar ayında Ağ Ev bəyan etmişdi ki, əgər Iran “ədalətli razılaşma” məqsədilə danışıqlara qoşulmasa və nüvə silahı əldə etmək planlarından tam imtina etməsə, Vaşinqton güc tətbiq etməyə hazırdır. İran hakimiyyəti isə dəfələrlə nüvə bombası yaratmaq niyyətində olmadığını bəyan edib.
Fevralın 17-də Cenevrədə ABŞ və İran arasında nüvə məsələsi üzrə danışıqların ikinci raundu keçirilib. Görüş Omanın vasitəçiliyi ilə baş tutub. İranın xarici işlər naziri Abbas Əraqçı tərəflərin bir sıra məsələlər üzrə qarşılıqlı anlaşmaya gəldiyini və bunun gələcək saziş layihəsi üçün əsas yarada biləcəyini bildirib.
Cey Di Vens isə qeyd edib ki, danışıqlar bəzi istiqamətlər üzrə uğurlu keçsə də, Tehran hələlik Ağ Evin irəli sürdüyü bəzi fundamental mövqeləri qəbul etməyə hazır deyil.
Bundan əvvəl ABŞ və Israel İranın təkcə nüvə proqramından deyil, həm də ballistik raket istehsalından və Yaxın Şərqdəki pro-İran qüvvələrinə dəstəkdən imtina etməsini tələb edib. Danışıqların üçüncü raundunun cümə axşamı keçirilməsi planlaşdırılır.
