MOL şirkəti Adriatik neft kəməri operatoru JANAF-dan fevralın 27-dək təminat istəyib...
Poliqon xəbər verir ki, Telex portalının məlumatına görə, Macarıstanın enerji şirkəti MOL Xorvatiyanın JANAF şirkətindən Rusiya neftinin tranzitinin təmin olunmasını tələb edib. Şirkət Adriatik neft kəmərinin operatoruna ünvanladığı müraciətdə ən geci fevralın 27-dək Rusiya neftinin dəniz yolu ilə daşınmasına icazə veriləcəyinə dair zəmanət istəyib.
MOL bəyan edib ki, əks halda məsələ ilə bağlı Avropa Komissiyasına müraciət edə və dəymiş zərərə görə iddia qaldıra bilər. Şirkət hesab edir ki, mövcud vəziyyətdə alternativ marşrutların təmin olunması hüquqi baxımdan mümkündür.
Macarıstan şirkəti qeyd edib ki, Rusiya neftinin Adriatik istiqamətində tanker vasitəsilə daşınması qanunidir, çünki Drujba neft kəməri Ukrayna tərəfindən bağlanıb. MOL-un açıqlamasına görə, Avropa İttifaqı qaydalarına əsasən, əgər boru kəməri ilə tədarük üzv dövlətin nəzarətindən kənar səbəblərlə dayandırılıbsa, dəniz yolu ilə tranzitə icazə verilir.
Şirkət əlavə edib ki, müqavilə bağlanmış nəqliyyat və satış tərəfdaşları ABŞ sanksiya siyahısında yer almadığı üçün dəniz yolu ilə tədarük ABŞ sanksiyalarını pozmur.
Bundan əvvəl MOL Xorvatiyanın JANAF şirkəti ilə Adria neft kəmərinin ötürmə qabiliyyətinin test edilməsi ilə bağlı razılıq əldə olunduğunu açıqlamışdı. Eyni zamanda, Avropa Komissiyası Drujba kəmərinin dayanması fonunda Macarıstan və Slovakiyaya müvəqqəti olaraq Adria marşrutu ilə neft almağı təklif etmişdi.
Məsələ Avropa enerji təhlükəsizliyi və sanksiya rejimi çərçivəsində yeni müzakirələrə səbəb olub. Ekspertlər bildirirlər ki, regionda alternativ nəqliyyat marşrutlarının genişləndirilməsi həm siyasi, həm də iqtisadi baxımdan həssas mövzu olaraq qalır.
Poliqon.info
