İran tərəfi yüksək dəqiqlikli raketdən istifadə edildiyini bildirir, bölgədə gərginlik daha da artır...
İran İslam İnqilabı Keşikçiləri Korpusu (SEPAH) Hərbi-Kosmik Qüvvələri Birləşmiş Ərəb Əmirliklərində yerləşən THAAD raketdən müdafiə sisteminin radarını məhv etdiyini və ABŞ Hərbi Dəniz Qüvvələrinə məxsus yardımçı gəmini sıradan çıxardığını bəyan edib.
Poliqon xəbər verir ki, bu barədə İranın dövlət teleradio şirkəti IRIB SEPAH-ın mətbuat xidmətinə istinadən məlumat yayıb.
Açıqlamada bildirilir ki, zərbə Ər-Ruveys rayonu yaxınlığında endirilib və əməliyyat zamanı yüksək dəqiqlikli raketdən istifadə olunub. İran tərəfi radar sisteminin tamamilə sıradan çıxarıldığını iddia edir. Həmçinin qeyd olunur ki, ABŞ Hərbi Dəniz Qüvvələrinə məxsus yardımçı gəmi raket və pilotsuz uçuş aparatları ilə həyata keçirilən hücum nəticəsində fəaliyyət qabiliyyətini itirib.
THAAD sistemi ABŞ istehsalı olan uzaqmənzilli raketdən müdafiə kompleksidir və ballistik raketlərin atmosferdən kənarda və ya son mərhələdə məhv edilməsinə xidmət edir. Bu sistemin sıradan çıxarılması ilə bağlı iddialar regionda hava hücumundan müdafiə imkanlarının zəiflədilməsi kimi qiymətləndirilir.
Xatırladaq ki, fevralın 28-də ABŞ və İsrail İrana qarşı birgə hərbi əməliyyata başlayıb. ABŞ-nin prezidenti Donald Tramp xalqa müraciətində zərbələri Tehranın nüvə proqramından imtina etməməsi ilə əlaqələndirib və bunu Vaşinqtonun səbrinin tükənməsi ilə əsaslandırıb.
Hərbi əməliyyatlar zamanı İranın bir sıra şəhərlərinə, o cümlədən paytaxt Tehrana zərbələr endirilib. Hücumlardan biri İranın ali rəhbəri Əli Xameneinin iqamətgahına tuş gəlib və o, zərbə nəticəsində həlak olub. Bunun ardınca İran İsrail ərazisinə və Yaxın Şərqdə yerləşən ABŞ hərbi bazalarına raket və pilotsuz uçuş aparatları ilə cavab zərbələri endirib.
Analitiklər bildirirlər ki, SEPAH-ın BƏƏ ərazisində yerləşən hərbi obyektə və ABŞ donanmasına qarşı hücum iddiaları qarşıdurmanın coğrafiyasını genişləndirir və regionda yeni eskalasiya mərhələsinin başlaya biləcəyini göstərir. Rəsmi Vaşinqton və Əbu-Dabi tərəfindən hələlik hadisə ilə bağlı ətraflı təsdiqləyici açıqlama verilməyib.
Poliqon.info
