Reuters: İranla münaqişə səbəbilə tədarükdə yaranan fasilələr Hindistanı milyonlarla barrel Rusiya nefti almağa məcbur edib...
Hindistanın neft emalı zavodları İranla müharibə fonunda qlobal enerji təchizatında yaranan fasilələri kompensasiya etmək məqsədilə Rusiyadan təcili neft partiyalarının alışını artırır.
Poliqon xəbər verir ki, bu barədə Reuters Agentliyi məlumat yayıb.
Məlumata görə, Hindistanın enerji təhlükəsizliyi mövcud vəziyyətdə xüsusilə həssas hesab olunur. Belə ki, ölkənin strateji neft ehtiyatları təxminən 25 günlük daxili tələbatı qarşılaya bilir. Bundan əlavə, Hindistanın ümumi neft idxalının təxminən 40 faizi Hörmüz boğazı vasitəsilə həyata keçirilir və bu marşrut Yaxın Şərqdə artan hərbi gərginlik səbəbilə risk altındadır.
Agentliyin məlumatına əsasən, ABŞ-nin son aylarda göstərdiyi siyasi təzyiqlər nəticəsində Hindistan yanvar ayında Rusiyadan neft idxalını müəyyən dərəcədə azaltmışdı. Bu addım Vaşinqtonun tətbiq edə biləcəyi 25 faizlik tariflərdən yayınmağa və ABŞ ilə müvəqqəti ticarət razılaşmasının əldə olunmasına kömək etmişdi.
Lakin İranla bağlı münaqişə nəticəsində enerji bazarında yaranan qeyri-müəyyənlik Hindistanı yenidən Rusiya neftinə yönəlməyə məcbur edib. Reuters yazır ki, Hindistanın dövlət neft şirkətləri — Indian Oil Corporation (IOC), Bharat Petroleum (BPCL), Hindustan Petroleum (HPCL) və Mangalore Refinery and Petrochemicals Limited (MRPL) hazırda beynəlxalq treyderlərlə təcili neft partiyalarının alınması ilə bağlı danışıqlar aparırlar.
Mənbələrin bildirdiyinə görə, Hindistan artıq mart ayı və aprelin əvvəllərində çatdırılmaq şərti ilə təxminən 20 milyon barrel Rusiya nefti alıb. Bu alışlar ölkənin enerji tədarükündə yaranan boşluğu qısa müddətdə doldurmağa yönəlib.
Bazar məlumatlarına görə, Hindistan üçün nəzərdə tutulan Urals markalı Rusiya neftinin qiymətində də ciddi dəyişiklik baş verib. Fevral ayında bu neft Brent markalı etalon qiymətə nisbətən təxminən 13 dollar endirimlə satılırdı. Lakin son həftələrdə qiymət vəziyyəti dəyişib və Urals nefti artıq Brent qiymətinə nisbətən barrel üçün təxminən 4–5 dollar premium ilə təklif olunur.
Mənbələr həmçinin bildirir ki, Hindistanın ən iri enerji şirkətlərindən biri olan Reliance Industries də “təcili” neft partiyalarının alınması ilə maraqlanır. Bundan əlavə, bəzi Hindistan neft emalı zavodlarının artıq ölkə sahillərinə yaxın ərazilərdə lövbər salmış tankerlərdən neft seçdiyi qeyd olunur.
Reuters-in məlumatına görə, Vaşinqtonun bu alışlara qeyri-rəsmi şəkildə razılıq verib-vermədiyi hələlik aydın deyil. Lakin agentliyin mənbələri bildirir ki, Yeni Dehli bu məsələ ilə bağlı ABŞ Prezidenti Donald Tramp administrasiyasına müraciət edərək Rusiya neftinin alınmasına dair mövqeyini öyrənməyə çalışıb.
Enerji bazarı üzrə analitiklər hesab edirlər ki, Yaxın Şərqdə gərginliyin artması qlobal neft tədarük zəncirində yeni dəyişikliklərə səbəb olur. Bu proses xüsusilə böyük enerji idxalçısı olan Hindistan kimi ölkələrin enerji siyasətinə birbaşa təsir göstərir və onları alternativ mənbələrə yönəlməyə məcbur edir.
Poliqon.info
