Qiymət artımı Yaxın Şərqdə gərginliyin yüksəlməsi və ABŞ-nin İrana hücumundan sonra bazarda yaranan risklərlə əlaqələndirilir...
Poliqon xəbər verir ki, dünya bazarında Brent markalı neftin qiyməti 2024-cü il 5 iyul tarixindən bəri ilk dəfə olaraq 87 dollar həddini keçib.
Məlumata görə, Londonun ICE Futures birjasında Brent markalı neft üzrə may fyuçerslərinin qiyməti Moskva vaxtı ilə saat 12:54-ə olan göstəricilərə əsasən bir barel üçün 87,21 dollar təşkil edib. Bu isə əvvəlki ticarət sessiyasının bağlanış göstəricisi ilə müqayisədə 1,8 dollar və ya 2,11 faiz çoxdur.
Eyni zamanda, ABŞ-də Nyu-York Əmtəə Birjasında (NYMEX) elektron ticarət zamanı WTI markalı neftin aprel fyuçersləri də ciddi artım nümayiş etdirib. Belə ki, WTI üzrə qiymətlər 3,52 dollar və ya 4,35 faiz artaraq bir barel üçün 84,53 dollara yüksəlib.
Analitiklərin fikrincə, qlobal enerji bazarında qiymətlərin sürətlə artmasına əsas səbəblərdən biri Yaxın Şərqdə geosiyasi gərginliyin artması və ABŞ-nin İrana qarşı həyata keçirdiyi hərbi əməliyyatdır. Bu hadisələr enerji təchizatına mümkün risklər barədə narahatlıqları artıraraq bazarlarda spekulyativ artımı gücləndirib.
Bundan əvvəl Bloomberg agentliyi qeyd edib ki, ABŞ-nin İrana qarşı hücumu nəticəsində neft qiymətlərinin kəskin yüksəlməsi Rusiyanın gəlirlərini artıraraq ehtiyat fondlarının doldurulmasına kömək edə bilər. Agentlik hesab edir ki, yüksək qiymətlər Rusiyanın sanksiyalar şəraitində enerji ixracından əldə etdiyi gəlirlərə əlavə dəstək verə bilər.
Martın 5-də yayılan başqa bir məlumatda isə bildirilirdi ki, Hindistan İranda başlayan hərbi qarşıdurma fonunda Rusiya neftinin alışını artırıb. Daha sonra Reuters agentliyi yazıb ki, ABŞ Hindistana dənizdə tankerlərdə saxlanılan Rusiya neftini almağa icazə verib.
Poliqon.info
