Qətərin paytaxtı Dohada yerli vaxtla saat 03:15 radələrində təhlükə səviyyəsi yüksəldilib və mobil telefonlara fövqəladə vəziyyət xəbərdarlıqları göndərilib.
AFN.az xəbər verir ki, bu xəbərdarlıqlardan bir neçə dəqiqə sonra İrandan gələn raketləri məhv edən müdafiə sistemlərinə aid partlayış səsləri eşidilib.
Təxminən 12-13 partlayış səsindən sonra, 15 dəqiqə ərzində təhlükə səviyyəsi yenidən endirilib və təhlükənin aradan qaldırıldığı elan edilib. Qətər Müdafiə Nazirliyi silahlı qüvvələrin ölkəni hədəf alan raket hücumunun qarşısını aldığına dair rəsmi açıqlama yayıb.
Qətərlə yanaşı, bölgədəki digər ölkələr də İran qaynaqlı yeni bir hücum dalğası ilə üzləşib. Bəhreyn dövlət mediasının məlumatına görə, paytaxt Manamanın cənubundakı Sitra bölgəsinə təşkil edilən PUA hücumunda aralarında uşaqların da olduğu ən azı 32 vətəndaş yaralanıb.
Birləşmiş Ərəb Əmirliklərində də gərginlik yaşanıb. Ölkənin Müdafiə Nazirliyi hava hücumundan müdafiə sistemlərinin İrandan gələn təhdidləri dəf etdiyini bildirib. Bundan əlavə, Fuceyra neft sənayesi bölgəsində məhv edilən bir PUA-nın qalıqlarının düşməsi nəticəsində yanğın baş verdiyi qeydə alınıb.
