Finlandiya ilə İsveç arasında uzanan sualtı elektrik kabeli texniki nasazlıq səbəbindən sıradan çıxıb. Hadisədə sabotaj əlamətləri aşkar edilməyib. Bu barədə enerji operatorları Fingrid və Svenska kraftnät məlumat verib, xəbəri isə Reuters yayıb.
Fingrid şirkətinin nümayəndəsi Jonne Jäppinen bildirib ki, çərşənbə axşamı baş verən elektrik kəsilməsi iki ölkə arasındakı Fenno-Skan 2 enerji xəttində qeydə alınıb. Onun sözlərinə görə, problem böyük ehtimalla yarımstansiyada yaranmış nasazlıqla bağlıdır və sualtı kabel hissəsi zərər görməyib.
Svenska kraftnät-in açıqlamasına görə, elektrik kəsilməsinin səbəbi texniki nasazlıqdır və araşdırmaya polis və ya digər hüquq-mühafizə orqanları cəlb olunmayıb.
Tənzimləyici qurumun məlumatına görə, gücü 800 meqavat olan elektrik ötürücü xəttin fəaliyyəti təxminən 18 saatlıq dayandırılmalı idi.
“Qiymətləndirməmizə görə, Fenno-Skan sistemi yaxın vaxtlarda yenidən fəaliyyətini bərpa edəcək”, — deyə İsveç şirkəti Reuters-ə açıqlamasında bildirib.
Qeyd edək ki, son illərdə Baltik dənizi regionu sualtı elektrik kabellərinin, telekommunikasiya xətlərinin və qaz kəmərlərinin bir neçə dəfə zədələnməsindən sonra yüksək hazırlıq vəziyyətindədir. Bu cür hadisələrin səbəbi kimi həm sabotaj, həm də gəmilərin törətdiyi qəzalar göstərilir.
