Cebheinfo portalından verilən məlumata əsasən, ain.az bildirir.
Bu ilin yanvar ayında Azərbaycana Avropa ölkələrindən 12 894 turist səfər edib.
Bu, ötən ilin eyni dövrü ilə müqayisədə 19,8 % çoxdur. O cümlədən, hesabat dövründə Şərqi Avropa ölkələrindən Azərbaycana 6 075 turist gəlib. Bu da 1 il əvvələ nisbətən 1,1 % çoxdur.
Ay ərzində Qərbi Avropa ölkələrindən isə Azərbaycana 6 819 nəfər turist gəlib. Bu da ötən ilin eyni dövrünə nisbətən 43,5 % çoxdur. Qərbi Avropa ölkələri arasında ən çox turist 2 185 nəfər olmaqla Almaniyadan gəlib. Bu, 1 il əvvəllə müqayisədə 2,8 dəfə çoxdur.
Qeyd edək ki, hazırda ABŞ və İsrailin İrana hücumları, İranın cavab tədbirləri səbəbindən Yaxın Şərqdə münaqişə davam edir. Regiondakı gərginlik turizm sektoruna ciddi təsir göstərir.
İranın raket hücumları səbəbindən Körfəz ölkələrində otel rezervasiyalarının ləğvində artım müşahidə olunub. “Palm Jumeirah” və “Downtown” şəhərlərində adətən öncədən sifariş edilən otellərdə doluluq nisbətinin 20 faizdən aşağı düşdüyü bildirilir.
Dəbdəbəli həyat tərzi ilə tanınan turizm mərkəzi olan Dubayda müharibə səbəbindən lüks otel qiymətləri kəskin şəkildə aşağı düşüb. Müharibədən əvvəl gecəlik qiymətlər 400 avrodan başlasa da, bunun 83 faiz azalaraq 68 avroya çatdığı bildirilir.
Sektor nümayəndələri təhlükəsizliklə bağlı narahatlıqların regionda turizmə böyük zərbə vurduğunu bildiriblər. Avropa və Asiya bazarlarından edilən sifarişlərdə ləğv halları artıb və otellər doluluq nisbətini qorumaq üçün qiymətləri endiriblər.
Yaxın Şərqdə baş verən münaqişə Azərbaycanda turizm sektoruna necə təsir edəcək?
Məsələ ilə bağlı turizm üzrə ekspert Əziz Şiriyev “Cebheinfo.az”-a bildirib ki, Azərbaycan hazırda ən təhlükəsiz ölkələr siyahısındadır:
.jpg)
“Ərəb ölkələrində təhlükəsizlik hazırda yüksək səviyyədə deyil. Hava limanları bombalanıb. Bu baxımdan, yaxın ərəfədə ölkəmizə çox turistin gələcəyi gözlənilir. Təbii ki, biz il başlayanda onları proqnozlaşdırıb I, II, III, IV kateqoriyaya bölürük.
İlk onluqda ölkəyə ən çox gələn turistlər nəzərdə tutulur. Burada Rusiyadan, Türkiyədən, Özbəkistandan, ərəb və digər ölkələrindən gələnlər nəzərdə tutulur ki, bu suyahı ekspertlər və Dövlət Turizm Agentliyi tərəfindən müzakirə olunur. Artıq II, III, IV sırada olanlar bu yaxın gələcəkdə ön plana keçəcəklər.
Düşünürəm ki, avropalılar üçün də Azərbaycan ən təhlükəsiz ölkə olduğuna görə daha çox sayda turist artımı müşahidə olunacaq. Ancaq yanvar-fevral ayı turizm sektorunda aşağı mövsüm hesab olunur və bu mövsümdə istər-istəməz boşluqlar olur.
İstər otellərdə, istər restoranlarda, iaşə obyektlərində bu birmənalıdır. Ancaq mart ayından, bayramlardan mövsümə doğru getdikcə, tendensiyalı şəkildə say artacaq. Artıq may, iyun, iyul, avqust aylarında ölkəmizə kifayət qədər turist gəldiyini müşahidə etmək mümkün olacaq.
Hazırkı vəziyyətdə insanlar istənilən halda hər an təhlükənin yaranacağından ehtiyat edirlər. Artıq Amerika-İran müharibəsi sonlanmaq üzrədir. Bu, bütün dünya üzrə turizmin canlanacağına ümidləri artırır”.
Ekspert qeyd edib ki, dünyada baş verən bütün proseslər birbaşa turizmə təsirini göstərir:
“Məsələn, bu, iqtisadi, yaxud COVİD-19 kimi proseslər də ola bilər. Pandemiya ən çox zərəri turizmə vurdu. Hazırda dünyada olan müharibələr, gedən proseslər birbaşa turizmə təsir göstərir.
Ancaq bizim dövlətin apardığı siyasət istənilən halda ölkəmizi təhlükəsiz məkana çevirir və getdikcə mövsümlə əlaqədar olaraq turistlərin sayı artacaq. Yay aylarında ölkəmizə kifayət qədər turistin gəldiyinin şahidi olacağıq”.
Nigar Abdullayeva
“Cebheinfo.az”
Açar sözlər:
turistlər Əziz Şiriyev
Problemlərinizi bizə yazın, şahidi olduğunuz hadisələri çəkib göndərin
Hadisənin gedişatını izləmək üçün ain.az saytında ən son yeniliklərə baxın.
