Beynəlxalq Enerji Agentliyi (BEA) Yaxın Şərqdəki münaqişə fonunda bazarı sabitləşdirmək məqsədilə öz tarixindəki ən böyük həcmdə neft ehtiyatını dövriyyəyə buraxmağı təklif edib.
AFN.az "The Wall Street Journal"a istinadən xəbər verir ki, 1974-cü ildə yaradılmış agentliyin bu təklifi 2022-ci ildə istifadəyə verilmiş 182 milyon barellik rekord göstəricini də ötür. Məsələ ilə bağlı qəti qərarın martın 11-də verilməsi gözlənilir və təklifin təsdiqi üçün agentliyin 32 üzv ölkəsindən heç birinin buna etiraz etməməsi lazımdır.
Agentliyin rəhbəri Fatih Birol bildirib ki, üzv ölkələrin sərəncamında 1,2 milyard bareldən çox dövlət fövqəladə ehtiyatı və 600 milyon barel sənaye ehtiyatı var. "Rapidan Energy Group"un məlumatına görə, ABŞ və İsrailin İrana qarşı hərbi əməliyyatları səbəbindən Hörmüz boğazında gəmiçiliyin dayanması dünya neft tədarükündə tarixin ən böyük kəsilməsinə yol açıb.
Hazırda qlobal neft tədarükünün təxminən 20%-i bu gərginlikdən təsirlənib ki, bu da 1956-cı il Süveyş böhranı və 1990-cı illərin Fars körfəzi müharibəsi zamanı qeydə alınan göstəricilərdən qat-qat çoxdur. İran rəsmiləri boğazın rəsmən bağlanmadığını desələr də, hər iki tərəfin zərbə endirmək qorxusu səbəbindən tankerlər oradan keçməyə risk etmirlər.
