Amerikalı texnologiya şirkəti "Meta" süni intellekt texnologiyalarına keçid fonunda genişmiqyaslı işçi ixtisarını nəzərdən keçirir.
Redaktor.az xəbər verir ki, bu barədə "Reuters" agentliyi mənbələrə istinadla məlumat yayıb.
Məlumata görə, şirkətin işçi heyəti 20%-dən çox azala bilər. Eyni zamanda mənbələr qeyd edirlər ki, ixtisarların dəqiq vaxtı və miqyası hələ təsdiqlənməyib.
Əgər işdən çıxarmalar həqiqətən işçilərin təxminən beşdə birinə təsir edəcəksə, bu, 2022-ci ilin sonu – 2023-cü ilin əvvəlində aparılan struktur dəyişikliklərindən bəri ən böyük ixtisar olacaq. Həmin vaxt şirkət 21 min işçini işdən çıxarmışdı ki, bu da işçi heyətinin təxminən 25%-i demək idi.
2025-ci ilin dekabr ayına olan məlumata görə, "Meta"da təxminən 79 min nəfər çalışırdı.
Son illərdə şirkət rəhbəri Mark Zukerberq digər texnologiya şirkətləri ilə süni intellekt sahəsində rəqabəti gücləndirməyi aktiv şəkildə təşviq edir. Şirkət proqramçılar cəlb edir, "Moltbook" və "Manus" da daxil olmaqla startapları alır.
Bundan əlavə, "Meta" 2028-ci ilə qədər məlumatların saxlanması və emalı üçün mərkəzlərin inşasına 600 milyard dollar sərmayə qoymağı planlaşdırır.
"Reuters" qeyd edir ki, ixtisarlar digər ABŞ texnologiya şirkətlərində də davam edir. Məsələn, "Amazon" yanvar ayında 16 min işçinin, yəni təxminən 10% işçi heyətinin işdən çıxarılacağını elan etmişdi.
