Ali Məhkəmədə xüsusi amansızlıqla qəsdən sağlamlığa ağır zərər vurmada təqsirləndirilən Tural Bayramovun barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Nazim Mövsümovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, hadisə 27 aprel 2024-cü il tarixdə Zaqatala rayonunun Qandax kəndində yerləşən “Master” kafedə qeydə alınıb.
Belə ki, Tural Bayramov sərxoş vəziyyətdə olarkən həmkəndlisi, zərərçəkmiş Nurlan Muradova məxsus sözügedən kafedə səs-küy salıb, ünvansız söyüşlər işlədib. Zərərçəkmiş də onun bu hərəkətlərini irad tutaraq kafedən qovmağa çalışıb. Bu zaman Tural mətbəx bıçağı ilə Nurlana 12 zərbə endirərək ona ağrı bədən xəsarətləri yetirib.
Hadisədən sonra Nurlan xəstəxanaya çatdırılıb, Tural Bayramov isə Zaqatala Rayon Polis Şöbəsinin əməkdaşları tərəfindən saxlanılıb.
Araşdırmalar zamanı məlum olub ki, hadisəni törətməkdə təqsirli bilinən Tural Bayramov 2020-ci il fevralın 20-də də eyni əmələ görə - həmkəndlisini mübahisə zəminində bıçaqladığı üçün məhkumluq həyatı yaşayıb. O, bir müddət əvvəl azadlığa çıxıb. Bu dəfə isə o, kafenin sahibinə xəsarət yetirib. Xoşbəxtlikdən ölüm faktı qeydə alınmayıb.
Şəki Ağır Cinayətlər Məhkəməsinin hökmü ilə Tural Bayramov 7 il 6 ay müddətinə azadlıqdan məhrum edilib. Şəki Apellyasiya Məhkəməsinin qərarına əsasən, dövlət ittihamçısının apellyasiya protesti təmin edilib, Şəki Ağır Cinayətlər Məhkəməsinin 7 il 6 ay müddətinə azadlıqdan məhrumetmə hökmü apellyasiya protestinə münasibətdə qismən, cəzaya aid hissədədəyişdirilib. Şəki Ağır Cinayətlər Məhkəməsinin hökmündən Zaqatala Rayon Məhkəməsinin hökmü ilə təqsirləndirilən şəxs təyin edilmiş 6 ay müddətə azadlıqdan məhrumetmə cəzasının ümumi cəzadan çıxılması və onun üzərində qəti olaraq 7 il müddətə azadlıqdan məhrumetmə cəzası saxlanılması ilə bağlı müddəalar xaric edilib.
Kamal Məmmədov
