Bazar ertəsi günü Çin texnologiya nəhəngi Xiaomi Corpın səhmləri 5%-dən çox bahalaşıb. Şirkət bildirir ki, bu həftə SU7 elektrik sedanının yenilənmiş versiyasını təqdim edəcək. Bu artım Hang Seng indeksinin 1%-dən çox qalxmasına da təkan verib.
Xiaomi-nin məlumatına görə, növbəti nəsil SU7 modeli rəsmi olaraq 19 martda təqdim olunacaq. Şirkətin Baş direktoru Lei Jun bildirib ki, avtomobilin təqdimatı əvvəlcədən planlaşdırılandan tez olacaq.
Yenilənmiş SU7 modeli batareya performansı, təhlükəsizlik və hardware xüsusiyyətləri baxımından təkmilləşdirilib və Xiaomi-nin 2026-cı il üçün ən azı 550 min elektrik avtomobili satmaq hədəfində mərkəzi rol oynayır.
Şirkət 2024-cü ildə SU7 ilə elektrik avtomobil bazarına uğurlu giriş edib, 2025-ci ildə isə YU7 elektrik krossoveri satışlarda yaxşı nəticələr göstərib. Lakin Çin EV bazarı çox rəqabətlidir və yerli şirkətlər pay qazanmaq üçün agressiv endirimlər tətbiq edirlər. Fevral ayında Xiaomi-nin EV satışları isə illik müqayisədə 14% azalıb.
