Moderator.az portalından alınan məlumata görə, ain.az xəbər verir.
"Rusiya XİN rəhbəri Vaşinqton və Qüdsün İranla bağlı hesablamalarının yanlış olduğunu bildirib və Moskvanın vasitəçilik etməyə hazır olduğunu deyib..."
Rusiya xarici işlər naziri Sergey Lavrov ABŞ və İsraili İranla bağlı hərbi əməliyyatlara görə kəskin tənqid edib və Tehranın mövqeyini müdafiə edən açıqlamalar verib.
Moderator.az xəbəf verir ki, bu barədə "tass.ru" agentliyi məlumat yayıb.
Moskvanın sərt ittihamları
Rusiya Xarici İşlər Nazirliyinin yaydığı məlumata görə, Lavrov bu fikirləri Moskvada keçirilən nüvə silahlarının yayılmaması üzrə konfransın iştirakçılarına müraciətində səsləndirib. Lavrov bildirib ki, regiondakı gərginlik ABŞ və İsrailin hərbi əməliyyatları fonunda daha da dərinləşib.
Onun sözlərinə görə, hücumlar zamanı yalnız İranın siyasi və hərbi rəhbərliyi deyil, həm də mülki obyektlər - məktəblər, xəstəxanalar və digər infrastrukturlar hədəfə alınıb. Rusiya diplomatı xüsusilə Beynəlxalq Atom Enerjisi Agentliyinin nəzarətində olan nüvə obyektlərinə zərbələrin endirilməsini tənqid edib.
Lavrovun sözlərinə görə, hücumların İran və ABŞ arasında nüvə proqramı ilə bağlı dolayı danışıqların getdiyi bir vaxtda baş verməsi "xüsusi siyasi riyakarlıq" kimi qiymətləndirilə bilər. Onun fikrincə, bu hadisələr həm nüvə silahlarının yayılmaması müqaviləsinin, həm də diplomatiyanın nüfuzuna ciddi zərbə vurub.
"Tehran müqavimət göstərir"
Rusiya diplomatı həmçinin bildirib ki, ABŞ və İsrail İranı qısa müddətdə məğlub edə biləcəklərini düşünürdülər, lakin hadisələrin gedişi bu hesablamaların yanlış olduğunu göstərir.
Onun sözlərinə görə, Tehran hazırda hücumlara cavab verir və regionda yerləşən hərbi infrastrukturlara zərbələr endirir. Lavrov etiraf edib ki, bu proses nəticəsində bəzi Fars körfəzi ölkələri də zərər görə bilər.
Nazir əlavə edib ki, baş verənlər bir çox dövlətlərdə belə bir düşüncəni gücləndirir: yalnız nüvə silahına sahib olmaq ölkənin təhlükəsizliyinə real təminat verə bilər. Onun fikrincə, bu isə qlobal səviyyədə yeni yayılma riskləri yaradır.
Bioloji ittihamlar və vasitəçilik təklifi
Lavrov çıxışında Qərbi başqa bir mövzuda da ittiham edib. O iddia edib ki, bəzi dövlətlər gizli laboratoriyalarda virusların dəyişdirilməsi və süni xüsusiyyətlərə malik mikroorqanizmlərin hazırlanması ilə məşğul olur.
Rusiya diplomatı eyni zamanda bildirib ki, Moskva İran ətrafındakı böhranın həlli üçün vasitəçi rolunu oynamağa hazırdır. Onun sözlərinə görə, əgər tərəflər belə bir təşəbbüsə ehtiyac duysalar, Rusiya siyasi prosesdə iştirak edə bilər və İranın təhlükəsizliyinə dair beynəlxalq təminatların yaradılmasını vacib hesab edir.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
