İran səbəbindən neftin qiymətləri artarkən, bəzi Aİ ölkələri artıq radikal addımlar atıblar - yanacaq satışına inzibati məhdudiyyətlər qoyulub. Bu barədə Reuters və Trans.INFO məlumat verib.
Yaxın Şərqdəki hadisələr Avropada yanacaq qıtlığına səbəb olub. İndi sürücülər nəinki daha çox pul ödəyir, həm də yanacaqdoldurma məntəqələrində yeni məhdudiyyətlər səbəbindən çənlərini doldura bilmirlər. Böhran Mərkəzi Avropaya ən çox zərbə vurub. Bəzi ölkələrin hökumətləri sərt gündəlik kvotalar tətbiq etməklə panikanı və "yanacaq turizmini" cilovlamağa çalışırlar.
İrandakı münaqişə ilə bağlı gərginliyin ən görünən nəticəsi Sloveniyada yanacaq satışına qoyulan inzibati məhdudiyyətlərdir. Hazırda fərdi sürücülərə gündə 50 litrə qədər yanacaq doldurmağa icazə verilir. Bizneslər üçün isə limit bir qədər yüksəkdir: 200 litr.
Baş nazir Robert Holob ictimaiyyəti ölkədə ehtiyatların olduğuna əmin edir, lakin logistika tələbatın artmasına uyğunlaşa bilmir. Artıq stansiyalara yanacaq çatdırmaq üçün hərbçilər cəlb olunur.
Bu arada, Slovakiya maliyyə limitini tətbiq edib: hər nəqliyyat vasitəsi üçün maksimum 400 avro. Bu, yük maşınları üçün vacibdir: bu məbləğ standart yük maşınının çən tutumunun 20%-dən az hissəsini əhatə edir.
Bəzi ölkələr məhdudiyyətlər əvəzinə maliyyə vasitələri ilə proaktiv hərəkət etməyə çalışırlar. İtaliya artıq 2026-cı ilin yazında dizel qiymətlərinin kəskin artmasının qarşısını almaq üçün aksiz vergilərində müvəqqəti azalma və nəqliyyat şirkətləri üçün 100 milyon avroluq vergi güzəşti elan edib.
Əziz MUSTAFA
