İngiltərədə meningokok infeksiyası ilə bağlı yayılan xəbərlər diqqət mərkəzinə düşüb.
Musavat.com xəbər verir ki, Böyük Britaniyanın Səhiyyə Təhlükəsizliyi Agentliyinin (UKHSA) məlumatına görə, Kent bölgəsində, xüsusilə Canterbury ətrafında ilkin mərhələdə 34 yoluxma halı qeydə alınıb. Onlardan 23-ü laboratoriya tərəfindən təsdiqlənmiş, digər hallarla bağlı araşdırmalar aparılıb.
Sonrakı rəsmi yeniləmələrdə isə bildirilib ki, əlavə laborator yoxlamalar nəticəsində bəzi halların diaqnozu dəyişdirilib. Bu səbəbdən ümumi yoluxma sayı əvvəlcə 29-a, daha sonra isə 23-ə qədər azaldılıb.
Məlumata görə, yoluxmalar əsasən Kent bölgəsində cəmləşib və hadisələrin bir hissəsi Canterbury şəhəri ilə əlaqələndirilir. Araşdırmalar zamanı bəzi halların ictimai məkanlarla, o cümlədən əyləncə obyektləri ilə epidemioloji bağlılığı yoxlanılır. Həmçinin universitet tələbələri və bəzi təhsil müəssisələri ilə əlaqələr də araşdırma predmetidir.
UKHSA bildirib ki, vəziyyət nəzarət altındadır və geniş əhali üçün risk aşağı qiymətləndirilir. Yoluxmuş şəxslərlə yaxın təmasda olanlara profilaktik antibiotik müalicəsi tətbiq olunur, risk qrupları üçün isə peyvəndləmə tədbirləri genişləndirilir.
Səhiyyə qurumları qeyd edir ki, meningokok infeksiyası nadir hallarda rast gəlinir, lakin ağır fəsadlara səbəb ola bilər. Buna görə də erkən diaqnoz və vaxtında müdaxilə mühüm əhəmiyyət daşıyır.
Musavat.com
