Rusiya Prezidenti Vladimir Putin martın 27-də videokonfrans vasitəsilə Dərbənddə binası yeni təmirdən çıxmış Azərbaycan Dövlət Musiqili Dram Teatrının açılışında iştirak edib.
AZƏRTAC xəbər verir ki, mərasimdə Rusiya dövlətinin başçısı Rusiya ilə Azərbaycan arasında münasibətlərin mədəni irs də daxil olmaqla, ortaq tarixi keçmişin möhkəm təməli üzərində inkişaf etdiyini qeyd edib və Bakıdan teatrın açılışına gələn qonaqları salamlayıb.
Tədbirdə Dağıstanın başçısı Sergey Məlikov və Azərbaycandan gələn nümayəndə heyəti, teatr ictimaiyyətinin nümayəndələri də iştirak edib. Qeyd edilib ki, yenilənmiş teatrın açılışı regionun mədəni həyatı və humanitar əlaqələrin möhkəmləndirilməsi üçün əlamətdar hadisədir.
Əvvəllər “Rodina” (Vətən) kinoteatrı kimi fəaliyyət göstərən teatrın binası tamamilə yenidən qurulub.
Rəsmi proqram çərçivəsində Novruz bayramına həsr olunmuş kütləvi tədbirlər, mükafatlandırma mərasimi və konsert proqramı planlaşdırılıb.
Teatrın tarixi təxminən 150 ili əhatə edir və Dərbənddə Azərbaycan ziyalılarının nümayəndələri tərəfindən qurulan həvəskar türk dram dərnəyi ilə başlayıb, sonradan isə həmin dərnək peşəkar teatrın təməlini təşkil edib.
