Enerji içkilərinin uşaq və yeniyetmələrin ürək-damar sisteminə vurduğu zərbə bir çox hallarda geri dönməz fəsadlara yol açır. Xüsusilə “Bizon”, “Redbull”, “Hell” və digər bu qəbildən olan stimullaşdırıcı içkilərin tərkibindəki yüksək dozalı kofein, taurin və şəkər kombinasiyası uşaq ürəyi üçün sanki bir “elektrik şoku” effekti yaradır. Gündəlik qəbul zamanı orqanizm daimi stress vəziyyətində qalır ki, bu da gənc yaşda infarkt riskini belə stimullaşdıra bilər.
Məsələ ilə bağlı NOCOMMENT.az-a danışan kardioloq Firdovsi İbrahimov bildirib ki, enerji içkiləri ürək əzələsini daxildən gərginləşdirərək onun təbii ritmini pozur:
“Uşaqların və yeniyetmələrin ürək-damar sistemi hələ tam formalaşmadığı üçün kofein və taurin kimi maddələrə qarşı həddindən artıq həssasdır. Bu içkilər qəbul edildikdən qısa müddət sonra ürək döyüntülərinin sayını kəskin artırır (taxikardiya) və damarların daralmasına səbəb olur. Hər gün enerji içkisi içən uşağın ürəyi sanki 24 saat dayanmadan qaçırmış kimi işləyir. Bu da vaxtından əvvəl ürək əzələsinin yorulmasına, yəni kardiomiopatiyaya və ritm pozğunluqlarına (aritmiya) gətirib çıxarır”.
Onun sözlərinə görə, bu içkilərin yaratdığı süni enerji partlayışı qəfil ölüm riskini də artırır:
“Enerji içkiləri orqanizmə enerji vermir, əksinə, bədənin mövcud ehtiyatlarını amansızcasına talan edir. Tərkibindəki yüksək şəkər qanda insulini sıçrayışla artırır, kofein isə sinir sistemini həddən artıq oyanıq saxlayır. Bu zərərli zəncir ürəyin elektrik keçiriciliyində nasazlıq yaradır. Tibbi praktikada enerji içkisindən asılı olan uşaqlarda ürək genişlənməsi və qapaq çatışmazlığı kimi hallara getdikcə daha çox rast gəlirik. Bəzən bu proses o qədər sürətlə gedir ki, uşaqda qəfil ürək dayanması baş verə bilər”.
Kardioloq qeyd edib ki, valideynlər uşaqlarda yaranan ilkin əlamətlərə qarşı sayıq olmalıdırlar:
“Əgər uşaqda səbəbsiz yerə əl əsməsi, döş qəfəsində sancılar, tez yorulma və ya gecə yuxusuzluğu müşahidə olunursa, bu artıq ürəyin ‘yardım’ harayıdır. Enerji içkiləri bədəndə kalsium və maqnezium balansını da pozur ki, bu minerallar ürəyin normal yığılması üçün həyatidir. Valideynlər anlamalıdırlar ki, bu içkilər sadəcə şirin su deyil, tərkibi kimyəvi qatqılarla dolu olan ciddi stimulyatordur. Uşaq ürəyini qorumaq üçün bu cür içkilərin evə daxil olması belə qadağan edilməlidir”.
Tunar
NOCOMMENT.az
