WP: ABŞ hərbi rəhbərliyi yüksək zənginləşdirilmiş uranın çıxarılması üçün genişmiqyaslı əməliyyat planı hazırlayıb...
Poliqon xəbər verir ki, ABŞ hərbi rəhbərliyi ölkə prezidenti Donald Trampa İranda yerləşən təxminən 450 kiloqram yüksək zənginləşdirilmiş uranın ələ keçirilməsi ilə bağlı əməliyyat planı təqdim edib. “The Washington Post” qəzetinin məlumatına görə, plan çərçivəsində hərbi texnikanın hava yolu ilə daşınması, həmçinin yük təyyarələrinin enişi üçün xüsusi uçuş-enmə zolağının tikilməsi nəzərdə tutulur ki, radioaktiv materiallar ölkədən çıxarılsın.
Məlumata əsasən, bu kompleks plan Trampa ötən həftə təqdim edilib və prezidentin özü belə təkliflərin hazırlanmasını əvvəlcədən tələb edib. Eyni zamanda, ona əməliyyatın son dərəcə yüksək risklər daşıdığı barədə də geniş məlumat verilib.
Ekspertlər qeyd edirlər ki, bu əməliyyat tarixdə ən çətin xüsusi hərbi missiyalardan biri hesab olunur. Planın icrası üçün yüzlərlə, hətta minlərlə hərbçinin və ağır texnikanın İran ərazisinin dərinliklərinə yerləşdirilməsi tələb oluna bilər.
Pentaqonun keçmiş rəsmilərinin qiymətləndirməsinə görə, belə bir missiyanın icrası bir neçə həftə çəkə bilər və əməliyyat müddətində ABŞ qüvvələri davamlı olaraq qarşı tərəfin hücumları ilə üz-üzə qalacaq. Bu isə həm insan itkiləri, həm də əməliyyatın uğursuzluq ehtimalını əhəmiyyətli dərəcədə artırır.
Analitiklər hesab edir ki, bu cür planların müzakirəyə çıxarılması regionda gərginliyi daha da yüksəldə və ABŞ ilə İran arasında qarşıdurmanın yeni mərhələyə keçməsinə səbəb ola bilər.
Poliqon.info
