Bloomberg: Moskva Madaqaskardakı çevrilişdən sonra adada təhlükəsizlik sisteminə inteqrasiya olunur...
Poliqon xəbər verir ki, Rusiya Madaqaskarda hərbi mövcudluğunu genişləndirərək bu Afrika ölkəsində təsir imkanlarını artırır. Bloomberg Agentliyinin məlumatına görə, Madaqaskarın hərbi hakimiyyəti Rusiyadan yeni silah və texnika partiyası alıb.
Məlumata əsasən, tədarük edilən paketə zirehli texnika, atıcı silahlar, sursat və hərbi geyimlər daxildir. Bu tədarük Madaqaskarın xunta rəhbəri Mikael Randrianirinanın Rusiya prezidenti Vladimir Putin ilə keçirdiyi danışıqlardan sonra reallaşıb.
Qeyd olunur ki, Moskva 2025-ci ilin oktyabrında Madaqaskarda baş verən çevrilişdən sonra adada mövqelərini sürətlə möhkəmləndirməyə başlayıb. İlkin mərhələdə Rusiya yeni rejimin təhlükəsizliyini təmin etmək üçün hərbi qüvvə və silah göndərib. Daha sonra isə helikopterlər təqdim edib və siklon sonrası humanitar dəstək göstərib.
Hazırda isə bu əməkdaşlıq daha da genişlənərək yeni silah tədarükləri və Madaqaskar zabitlərinin hazırlanması ilə davam etdirilir. Ekspertlərin fikrincə, bu addımlar Rusiyanın ölkənin təhlükəsizlik sisteminə mərhələli şəkildə inteqrasiya olunduğunu göstərir.
Analitiklər bildirirlər ki, Moskva Afrikada təsir dairəsini genişləndirmək üçün xüsusilə siyasi baxımdan qeyri-sabit ölkələrdə hərbi əməkdaşlıq modelindən istifadə edir. Bu yanaşma Rusiyaya həm strateji mövqe qazandırır, həm də regional təhlükəsizlik balansına təsir etmək imkanı verir.
Poliqon.info
