İran İslam İnqilabı Keşikçiləri Korpusu (SEPAH) İsfahan əyalətində ABŞ pilotunun xilas edilməsi əməliyyatı zamanı vurulduğu iddia edilən Amerika hərbi təyyarə və helikopterlərinin qalıqlarını əks etdirən video görüntülər yayımlayıb.
Musavat.com xəbər verir ki, SEPAH-ın rəsmi media resurslarında və dövlət televiziyasında nümayiş etdirilən kadrlarda səhranın ortasında yanmış və parçalanmış ağır hərbi texnika qalıqları, o cümlədən "C-130" nəqliyyat təyyarəsinin hissələri aydın görünür. İranın hərbi sözçüsü İbrahim Zülfiqari bu görüntüləri ABŞ ordusunun "rəzil məğlubiyyəti" kimi təqdim edərək, iki təyyarə və iki helikopterin İranın hava hücumundan müdafiə sistemləri tərəfindən məhv edildiyini bəyan edib.
Lakin Pentaqon bu iddiaları dərhal təkzib edərək bildirib ki, pilot uğurla təxliyə edildikdən sonra texniki nasazlıq səbəbindən havaya qalxa bilməyən "MC-130" təyyarələri və "MH-6" helikopteri məxfi texnologiyaların İranın əlinə keçməməsi üçün Amerika xüsusi təyinatlıları tərəfindən qəsdən partladılıb.
Peyk görüntüləri də ərazidə 28-ə yaxın partlayış kraterinin olduğunu göstərir ki, bu da ABŞ-ın təyyarələri yerdə məhv edərkən ətrafda "təmizləmə" əməliyyatı apardığını və ərazini tam nəzarətdə saxladığını sübut edir. Müstəqil hərbi ekspertlər qalıqların səpələnmə formasının təyyarələrin havada deyil, məhz yerdə güclü partlayışa məruz qaldığını göstərdiyini, bunun isə ABŞ-ın "özümüz məhv etdik" versiyasını təsdiqlədiyini vurğulayırlar.
Hazırda İsfahan səhrasındakı bu görüntülər hər iki tərəf üçün fərqli təbliğat vasitəsinə çevrilsə də, ABŞ pilotunun artıq təhlükəsiz zonada olduğu bildirilir.
Musavat.com
