BAKI, 7 aprel. TELEQRAF
Türk Dövlətləri Təşkilatının ümumi daxili məhsul 2,1 trilyon dollardan çoxdur, türk dövlətlərinin dünya iqtisadiyyatındakı payı təxminən 2 faizdir.
Teleqraf xəbər verir ki, bunu Milli Məclisdə TÜRKPA-nın İqtisadi əməkdaşlıq komissiyasının sədri, Qazaxıstan Parlamenti Məclisinin deputatı Anas Bakkojayev komissiyanın “TÜRKPA üzv dövlətlərinin birgə iqtisadi fəaliyyətinin həyata keçirilməsinin reallıqları və perspektivləri” mövzusunda on üçüncü iclasında deyib.
O qeyd edib ki, türk dövlətləri arasında qarşılıqlı ticarətin həcmi isə təxminən 57 milyard dollar təşkil edir. Türk dövlətlərinin xarici ticarətinin ümumi həcmi isə 1,1 trilyon ABŞ dolları miqdarındadır.
Deputat vurğulayıb ki, ölkələr arasında iqtisadi inkişafa töhfə verən müxtəlif faydalı təsirlər mövcuddur. Sahələrin müəyyən edilməsi, ikitərəfli və çoxtərəfli iqtisadi əməkdaşlığın nizamlı şəkildə qurulmasına əsaslanır:
“Bu çərçivədə iqtisadi əməkdaşlığın inkişafı, qarşılıqlı faydalı iqtisadi və ticarət əlaqələrinin genişlənməsinə səbəb olur. İqtisadi münasibətlərin hüquqi bazasının formalaşdırılması vacibdir. Türk dövlətləri arasında qarşılıqlı əlaqələrin gücləndirilməsi istiqamətində müxtəlif qurumlar yaradılır. İqtisadi fəaliyyətləri gücləndirmək məqsədilə konkret layihələr həyata keçirilir.
Anas Bakkojayev əlavə edib ki, bu proseslər türk dünyasında iqtisadi əlaqələrin daha da güclənməsinə, əlaqələrin dərinləşməsinə və ümumi inkişafın sürətlənməsinə xidmət edir.
“Əsas məqsəd ölkələr arasında ortaq fəaliyyətin təşviq edilməsi, iqtisadi potensialın daha effektiv şəkildə üzə çıxarılması və əməkdaşlığın genişləndirilməsidir. Xüsusilə üzv dövlətlər arasında bu cür fəaliyyətlərin koordinasiyası və mövcud məsələlərin öyrənilməsi mühüm əhəmiyyət kəsb edir. Bu istiqamətdə görülən işlər ölkələrimizin inkişafına müsbət təsir göstərəcək. Müxtəlif sahələrdə əməkdaşlığın genişləndirilməsi isə bu prosesin davamlılığını təmin edəcək”.
