BAKI,TurkicWorld, Orxan Qədirzadə
Bu həftə sonu İslamabadda keçiriləcək ABŞ və İran arasında atəşkəs danışıqlarında iştirak edəcək bütün nümayəndə heyətləri və jurnalistlər üçün Pakistan sərhədində viza verilməsi prosesi tətbiq olunacaq.
TurkicWorld xəbər verir ki, Pakistanın xarici işlər naziri İshaq Dar rəsmi açıqlamasında bildirib ki, İslamabad Danışıqları çərçivəsində ölkəyə gələn bütün iştirakçı dövlətlərin təmsilçiləri və media mənsubları hava limanlarında viza ilə təmin ediləcəklər. Nazir qeyd edib ki, Pakistan bu mühüm diplomatik görüşlərlə bağlı İslamabada səfər edən hər bir nümayəndə heyətini məmnuniyyətlə qarşılayır.
Məlumata görə, İshaq Dar hava yolu şirkətlərinə müraciət edərək, sözügedən şəxslərin viza tələb olunmadan təyyarəyə qəbul edilməsini xahiş edib. Pakistanın immiqrasiya orqanlarına isə həmin şəxslərin ölkəyə giriş nöqtələrində operativ şəkildə viza ilə təmin olunması barədə müvafiq tapşırıqlar verilib. Bu addım regional sülhün təmin edilməsi istiqamətində keçirilən danışıqların texniki prosedurlarını sürətləndirmək məqsədi daşıyır.
