Rusiya Dövlət Duması xarici vətəndaşların ölkədən deportasiya edilə biləcəyi cinayətlərin siyahısını genişləndirən qanun layihəsini nəzərdən keçirəcək.
Musavat.com xarici mediaya istinadla xəbər verir ki, təklif olunan əsaslara ictimai əxlaqı pozan və Rusiya ordusunu nüfuzdan salan məlumatların internetdə yayılması daxildir.
Bu barədə Dövlət Dumasının sədri Vyaçeslav Volodin bildirib.
Hazırda Rusiya İnzibati Xətalar Məcəlləsinin (İXM) 22 maddəsi miqrantların deportasiyasını nəzərdə tutur. Bunlara narkotik maddələrin qanunsuz dövriyyəsi və immiqrasiya pozuntuları daxildir.
Qanun layihəsi bu siyahını 43 maddəyə qədər genişləndirməyi təklif edir. Təklif olunan əlavələrə aşağıdakılar daxildir:
- ictimai asayişi pozmaq;
- ictimai asayişi qorumaq və təhlükəsizliyi təmin etmək vəzifələrini yerinə yetirərkən polis əməkdaşlarının və ya milli qvardiya qoşunlarının qanuni əmrlərinə tabe olmamaq;
- nəqliyyat və ya sosial infrastrukturun, rabitənin, piyadaların və nəqliyyat vasitələrinin fəaliyyətinə mane olmaq;
- insan ləyaqətini və ictimai əxlaqı təhqir edən məlumatların internetdə yayılması;
- Rusiya silahlı qüvvələrinin istifadəsini nüfuzdan salmağa yönəlmiş ictimai hərəkətlər, eləcə də Rusiyaya, fərdlərə və ya şirkətlərə qarşı sanksiyaların tətbiqi və ya uzadılması çağırışları.
Volodin qeyd edib ki, bir sıra qanun pozuntularına görə, deportasiya ilə yanaşı, cərimələr də tətbiq oluna bilər və onların artırılması qanunvericilik təşəbbüsü ilə nəzərdə tutulub.
Rusiya Federasiyası Dövlət Dumasının sədri həmçinin Daxili İşlər Nazirliyinin məlumatlarına istinad edib ki, 2025-ci ildə Rusiyadan 72.000 xarici vətəndaş deportasiya edilib.
Musavat.com
