Maliyyə pozuntuları iddiaları fonunda kanal rəhbərliyinin fəaliyyəti araşdırılır...
Azərbaycanın Space TV telekanalının redaksiyasında mümkün maliyyə pozuntuları ilə bağlı genişmiqyaslı yoxlamalar başlanıb.
Poliqon haqqin.az portalına istinadən xəbər verir ki, bu barədə azərbaycanlı jurnalist Arifə Əliyeva sosial şəbəkələrdə məlumat yayıb.
Jurnalistin sözlərinə görə, yoxlamalar telekanalın rəhbəri Vado Korovinin rəhbərlik etdiyi dövrü əhatə edir. Eyni zamanda, onun kürəkəni Nəriman Əbdüləliyevin fəaliyyəti də araşdırılır. Bildirilir ki, Əbdüləliyev hazırda telekanalda çalışır və onun fəaliyyətində də suallar yaradan məqamlar mövcuddur.
Arifə Əliyevanın iddiasına görə, son dövrlərdə Vado Korovin telekanalı “şəxsi təsərrüfatı” kimi idarə edib. O, peşəkar kadrları kanaldan uzaqlaşdıraraq onların yerinə öz yaxınlarını və qohumlarını cəlb edib. Bu vəziyyət redaksiya daxilində narazılıqlara və idarəetmə ilə bağlı ciddi suallara səbəb olub.
Hazırda yoxlamaların nəticələri gözlənilir. Mütəxəssislər hesab edir ki, araşdırmaların yekunları telekanalın gələcək idarəetmə strukturu və fəaliyyətinə birbaşa təsir göstərə bilər.
Poliqon.info
