Afrika qitəsində baş verən hadisə cəmiyyətdə ciddi narahatlıq doğurub. Azyaşlı uşağın həyatı son anda xilas edilib. AzPost yerli mənbələrə istinadla xəbər verir ki, Qananın Aşanti bölgəsində bir din xadimi körpəni diri-diri torpağa basdırmağa cəhd etdiyi üçün saxlanılıb.
Məlumata görə, hadisə axşam saatlarında Atvima Mponua dairəsinin Aboferm yaşayış məntəqəsində qeydə alınıb. Şübhəli şəxs kimi kilsə rəhbəri Richmond Akwasi Frimpong göstərilir. O, hadisə zamanı yanında olan digər bir nəfərlə birlikdə tutulub. Bildirilir ki, onlar gecə saatlarında tullantı sahəsində körpə ilə aşkar edilib.
Hadisənin qarşısını alan şəxs Winfred Agbah olub. Onun sözlərinə görə, vəziyyətdən şübhələnərək yaxınlaşıb və körpənin sağ olduğunu görüb. Bundan sonra dərhal ətrafdakılara məlumat verilib və hadisəyə müdaxilə olunub. Bu sayədə azyaşlının həyatı xilas edilib.
İlkin məlumatlara əsasən, şübhəli şəxs daha əvvəl uşağın öldüyünü iddia edib və onun dəfni ilə bağlı müzakirələr aparıb. Yerli icma nümayəndəsi Nana Yaw Badu isə körpənin sağ olmasından xəbərsiz olduğunu bildirib.
Hazırda körpə dövlət xəstəxanasına yerləşdirilib və həkim nəzarətində saxlanılır. Hadisədə iştirak edən şəxslər hüquq-mühafizə orqanları tərəfindən saxlanılıb və istintaq aparılır. Baş vermiş hadisənin səbəbləri və motivləri araşdırılır.
