“Financial Times” (FT) yazır ki, bəzi investorlar ChatGPT çat-botunun yaradıcısı olan “OpenAI” şirkətinin 852 milyard dollar həcmində qiymətləndirilməsinə şübhə edirlər. Şirkət bu qiymətə son maliyyələşdirmə raundu zamanı çatıb və “Amazon”, “Nvidia” və “SoftBank”dan 122 milyard dollar cəlb edib.
FT-nin həmsöhbətlərindən birinin fikrincə, bu cür qiymətləndirmə IPO zamanı şirkətin kapitallaşmasının 1,2 trilyon dollar və ya daha çox olacağını nəzərdə tutur. Bəzi investorlar həmçinin qeyd edirlər ki, “OpenAI”nin rəqibi “Anthropic”in daha aşağı — 380 milyard dollarlıq qiymətləndirilməsi ona investisiya qoyuluşunu “daha cəlbedici” edir.
“Bizi investorların dəstəkləmədiyi ilə bağlı iddialar faktlara ziddir”, — deyə “OpenAI”nin maliyyə direktoru Sara Frayar bildirib.
FT-nin məlumatına görə, investorları “OpenAI”nin strategiyasındakı tez-tez dəyişikliklər də “narahat edir”. Martın sonunda şirkət video generasiya edən Sora neyroşəbəkəsini bağlayıb. Bildirilirdi ki, “OpenAI” əsas məhsullara, ilk növbədə ChatGPT-yə fokuslanmaq və korporativ alətlər istiqamətini daha fəal inkişaf etdirmək niyyətindədir.
Bəzi investorlar isə korporativ süni intellekt alətləri bazarına çıxış qərarını o qədər də uğurlu hesab etmirlər, çünki “OpenAI” üçün “Anthropic” və “Google” ilə rəqabət aparmaq çətin olacaq. “Sizin ChatGPT kimi 1 milyard istifadəçisi olan və illik 50–100% artan bir biznesiniz var — bəs niyə sizə korporativ və proqramlaşdırma alətləri lazımdır?” — deyə FT investorlardan birinə istinadən yazır. Onun fikrincə, bu yanaşma “OpenAI”ni “həddindən artıq fokusdan yayındırılmış” edir.
