ABŞ administrasiyası hesab edir ki, Kuba hökuməti birbaşa Rusiya ordusu üçün insan resurslarının təmin olunmasına cəlb oluna bilər.
HİT.az xəbər verir ki, bu barədə “Axios” nəşri ABŞ Dövlət Departamentinin məxfi hesabatına istinadən yazır.
Senator Ted Kruz bildirib ki, Kuba rejimi ABŞ-ın maraqlarına dünyada zərbə vurur.
Hesabatda qeyd olunur ki, Havana yalnız bu prosesdən xəbərdar olmaya bilər, həm də onu dolayı və ya birbaşa şəkildə dəstəkləmiş ola bilər.
ABŞ Dövlət Departamentinə göndərilən hesabatda bildirilir ki, Kuba vətəndaşları Rusiya tərəfdən döyüşən ən böyük xarici qruplardan birinə çevrilib.
Sənəddə deyilir: “Kuba vətəndaşları Rusiya hərbi əməliyyatlarını dəstəkləyən ən böyük xarici döyüşçü qruplarından biridir”.
Məlumatlara görə, hazırda Ukrayna ərazisində 1 000–5 000 arası Kuba vətəndaşının döyüşdüyü ehtimal olunur. Ukrayna kəşfiyyatının qiymətləndirməsinə əsasən isə onların bir neçə min nəfəri birbaşa cəbhə xəttində yerləşdirilib.
ABŞ rəsmiləri bildirirlər ki, Kuba hökuməti öz vətəndaşlarının bu münaqişədə istifadə olunmasının qarşısını ala bilməyib və ya buna göz yumub.
“Rejim öz vətəndaşlarını Rusiya–Ukrayna müharibəsində alət kimi istifadə olunmaqdan qoruya bilmədi”, deyə Dövlət Departamentinin nümayəndəsi bildirib.
Məlumata görə, Rusiya son dövrlərdə Yaxın Şərq və digər regionlardan da döyüşçü cəlb etməyə çalışır. Sosial şəbəkələrdə və messencerlərdə, xüsusilə Telegram-da, xarici vətəndaşların hərbi xidmətə cəlb olunması ilə bağlı reklamların artdığı bildirilir.
Bəzi hallarda xarici vətəndaşlara Rusiya ordusunda xidmət müqabilində vətəndaşlıq vəd edildiyi də qeyd olunur.
Samir
