BAKI, 15 aprel. TELEQRAF
“Sülh hələ yenidir, körpə kimidir, buna görə də gündəlik qayğıya ehtiyac duyur”.
Teleqraf xəbər verir ki, bunu Ermənistan Baş naziri Nikol Paşinyan deyib.
“Xüsusilə bu gün, həmin bu körpə sülh “üçbaşlı müharibə partiyası” və onları dəstəkləyən qüvvələrin əsas hədəfinə çevrilib. Bu “üçbaşlı müharibə partiyası” sülhün yenidən nəzərdən keçirilməsindən və ya danışıqlar predmetinə çevrilməsindən danışır. Bağışlayın, amma kim zəmanət verə bilər ki, həmin danışıqlar nəticəsində sənəd daha yaxşı olacaq? Bu gün həmin qüvvələr Qarabağ və ətraf rayonları əhatə edən “xəritələrlə” və onları simvolizə edən “bayraqlarla” (Azərbaycana qarşı ərazi iddiası ilə - red.) çıxış edirlər”, - o bildirib.
Xatırladaq ki, Nikol Paşinyan “üçbaşlı müharibə partiyası” dedikdə, Ermənistanın sabiq prezidenti Robert Köçəryanın rəhbəri olduğu “Ermənistan” bloku, rusiyalı oliqarx Samvel Karapetyanın “Güclü Ermənistan” və digər oliqarx Qaqik Sarukyanın “Çiçəklənən Ermənistan” partiyalarını nəzərdə tutur.
