Alkoqolsuz pivənin sağlamlığa təsiri ilə bağlı aparılan araşdırmalar bəzi müsbət məqamları üzə çıxarsa da, mütəxəssislər bu içkinin "faydalı məhsul" kimi təqdim olunmasına ehtiyatla yanaşmağı tövsiyə edir.
Far.Az xəbər verir ki, araşdırmalara görə, alkoqolsuz pivə adi pivə kimi fermentasiya yolu ilə hazırlanır, lakin son mərhələdə tərkibindəki spirt çıxarılır. Bu səbəbdən içkidə müəyyən miqdarda faydalı maddələr qalır.
Mütəxəssislər bildirir ki, bu içkinin əsas üstünlüyü alkoqolun olmamasıdır. Xüsusilə spirtli içki qəbul edən şəxslər üçün alkoqolsuz alternativə keçid ümumi alkoqol istehlakını azaltmağa kömək edə bilər. Bununla bağlı Tsukuba Universiteti alimlərinin araşdırması da müəyyən azalma tendensiyasını göstərib.
Qeyd olunur ki, alkoqolsuz pivədə antioksidant xüsusiyyətə malik polifenollar da qismən saxlanılır. Bəzi tədqiqatlar bu maddələrin damar sağlamlığına müsbət təsir göstərə biləcəyini irəli sürsə də, nəticələr hələ məhduddur.
Eyni zamanda içkidə müəyyən hallarda prebiyotiklər və B qrupu vitaminləri də ola bilər. Lakin istehsal prosesi zamanı filtrasiya və pasterizasiya nəticəsində faydalı mikroorqanizmlərin böyük hissəsi məhv olur.
Araşdırmalarda alkoqolsuz pivənin fiziki yüklənmədən sonra maye balansını qismən bərpa edə biləcəyi də qeyd edilsə də, onun su və ya xüsusi idman içkilərindən daha effektiv olduğu sübut edilməyib.
Mütəxəssislər vurğulayır ki, alkoqolsuz pivə alkoqol qəbulunu azaltmaq üçün alternativ ola bilər. Lakin sağlamlıq üçün əlavə fayda əldə etmək məqsədilə bu içkini xüsusi olaraq rasiona daxil etmək tövsiyə edilmir.
