Bakı, 19 aprel, AZƏRTAC
Aprelin 18-də xarici işlər naziri Ceyhun Bayramov Antalya Diplomatiya Forumu çərçivəsində Əlcəzair Xalq Demokratik Respublikasının dövlət, xarici işlər, xaricdəki milli icma va Afrika məsələləri naziri Əhməd Attaf ilə görüşüb.
Xarici İşlər Nazirliyinin Mətbuat xidməti idarəsindən AZƏRTAC-a verilən məlumata görə, Azərbaycan ilə Əlcəzair arasında mövcud ikitərəfli və çoxtərəfli əməkdaşlıq gündəliyi, o cümlədən siyasi, iqtisadi və humanitar sahələrdə münasibətlərin inkişaf perspektivləri ətrafında fikir mübadiləsi aparılıb. Bu çərçivədə, iki ölkə arasında ticarət, iqtisadi, elmi və texniki əməkdaşlıq üzrə birgə komissiyanın yaradılması haqqında razılaşmanın əhəmiyyəti vurğulanıb. Birgə layihələrin icrası baxımından biznes icmasının bir araya gətirilməsinin vacib olduğu bildirilib.
Birləşmiş Millətlər Təşkilatı, İslam Əməkdaşlıq Təşkilatı (İƏT), Qoşulmama Hərəkatı və digər regional və beynəlxalq təşkilatlar çərçivəsində əməkdaşlıq və qarşılıqlı dəstək məsələləri, ölkəmizin 2027–ci ildə İƏT Zirvə Görüşünə ev sahibliyi kontekstində birgə fəaliyyət istiqamətləri müzakirə olunub.
Eyni zamanda, Yaxın Şərqdə gərginliyin azaldılması və atəşkəsin möhkəmləndirilməsinin, o cümlədən münaqişələrin diplomatik yolla həllinin əhəmiyyəti vurğulanıb.
Görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
