Energetika naziri Kris Rayt bildirib ki, ABŞ-də yanacağın qiyməti pik həddə yaxınlaşsa da, onun 3 dollardan aşağı enməsi bu ilin sonuna deyil, yalnız gələn ilə təsadüf edə bilər...
Poliqon xəbər verir ki, Bloomberg Agentliyinin yaydığı məlumata görə, ABŞ-nin energetika naziri Kris Rayt ölkədə benzin qiymətlərinin gələn ilə qədər 3 dollardan aşağı düşməyəcəyini bildirib. Bununla o, ABŞ-nin maliyyə naziri Skott Bessentin yay mövsümünədək qiymətlərin azalacağı ilə bağlı proqnozunu təkzib edib.
Kris Rayt qeyd edib ki, benzin qiymətləri, böyük ehtimalla, artıq ən yüksək səviyyəsinə çatıb və ABŞ-İsrail ilə İran arasında baş verən müharibənin “həllindən” sonra mütləq eniş başlayacaq. Bununla belə, o vurğulayıb ki, qiymətlərin nə vaxt gallon üçün 3 dollardan aşağı düşəcəyini dəqiq demək mümkün deyil.
Nazirin sözlərinə görə, bu, ilin sonlarına doğru da baş verə bilər, yaxud daha gec, yalnız gələn il mümkün ola bilər. Bu açıqlama ABŞ-də enerji bazarında qeyri-müəyyənliyin hələ də yüksək olaraq qaldığını göstərir.
Məlumata əsasən, hazırda ABŞ üzrə adi benzinin bir gallonunun orta qiyməti 4,10 dollar təşkil edir. Müharibə başlamazdan əvvəl isə bu göstərici 3 dollardan aşağı idi. Beləliklə, qısa müddət ərzində yanacaq bazarında ciddi bahalaşma qeydə alınıb.
Bildirilir ki, yüksək benzin qiymətləri Respublikaçılar Partiyası üçün də əlavə siyasi risk yaradır. ABŞ-də qarşıdan gələn seçki kampaniyası onsuz da mürəkkəb qiymətləndirilir və yanacaq qiymətlərinin yüksək qalması Respublikaçıların Nümayəndələr Palatası və Senat üzərində nəzarəti saxlamaq planlarına mənfi təsir göstərə bilər.
Enerji bazarında vəziyyətin yaxın aylarda əsasən Yaxın Şərqdəki hərbi-siyasi proseslərin inkişafından, eləcə də qlobal neft tədarükünün sabitliyindən asılı olacağı bildirilir.
Poliqon.info
