Bakı, 20 aprel, AZƏRTAC
ABŞ qüvvələrinin İran gəmilərinə qarşı təhdidləri və Vaşinqtonun Tehrana yönəlmiş məntiqsiz tələbləri ABŞ-nin Körfəz bölgəsindəki vəziyyətin həllinə ciddi yanaşmadığını göstərir.
AZƏRTAC xəbər verir ki, bu fikirləri İranın xarici işlər naziri Abbas Əraqçi pakistanlı həmkarı İshaq Dar ilə telefon danışığı zamanı səsləndirib.
O bildirib ki, İran limanlarına və gəmilərinə qarşı təhdidlər, eləcə də Vaşinqtonun məntiqsiz tələbləri ABŞ-nin regional həllə sadiq olmadığını nümayiş etdirir.
Əraqçi əlavə edib ki, “ABŞ-nin ziddiyyətli mövqeyi və atəşkəs rejimini pozması onun qeyri-səmimi niyyətlərini ortaya qoyur”.
İranın xarici işlər naziri ölkəsinin “maraqlarını və milli təhlükəsizliyini qorumaq üçün bütün mövcud vasitələrdən istifadə edəcəyini” vurğulayıb. O, həmçinin regionda sülh və təhlükəsizliyin təmin olunması məqsədilə məsləhətləşmələrin davam etdiyini qeyd edib.
