Hörmüz boğazında hərəkətin dayanması fonunda ölkə neft və neft məhsullarının çatdırılması ilə bağlı ciddi logistika çətinlikləri ilə üzləşib...
Poliqon xəbər verir ki, Bloomberg Agentliyinin yaydığı məlumata görə, Küveyt Hörmüz boğazında hərəkətin dayanması səbəbindən xam neft və emal olunmuş neft məhsullarının tədarükü üzrə fors-major elan edib. Bildirilir ki, bu qərar mövcud nəqliyyat məhdudiyyətləri və dəniz daşımalarında yaranmış fasilələr səbəbindən qəbul olunub.
Məlumata əsasən, yaranmış vəziyyət ölkənin bəzi müqavilələr üzrə öhdəliklərini vaxtında yerinə yetirməsini çətinləşdirib. Fors-major qərarı adətən tərəflərin nəzarətindən kənarda baş verən fövqəladə hallarda tətbiq olunur və müqavilə şərtlərinin müvəqqəti şəkildə dayandırılmasına və ya gecikdirilməsinə hüquqi əsas yaradır.
Hörmüz boğazı qlobal enerji bazarı üçün strateji əhəmiyyət daşıyan əsas marşrutlardan biri hesab olunur. Körfəz regionundan ixrac edilən neftin böyük hissəsi məhz bu keçid vasitəsilə dünya bazarlarına çıxarılır. Buna görə də boğazda hərəkətin dayanması yalnız Küveytin ixrac imkanlarına deyil, ümumilikdə beynəlxalq enerji təchizatına və qiymətlərə də təsir göstərir.
Ekspertlər hesab edirlər ki, əgər vəziyyət uzun müddət davam etsə, region ölkələrinin enerji ixracında əlavə gecikmələr, logistika xərclərinin artması və bazarda yeni dalğalanmalar yarana bilər. Bu isə xüsusilə Körfəz neftindən asılı olan iri idxalçı ölkələr üçün əlavə risklər formalaşdıracaq.
Poliqon.info
