Yeni araşdırma süni intellekt çatbotlarının sağlamlıqla bağlı verdiyi cavabların əhəmiyyətli hissəsinin etibarlı olmadığını ortaya qoyub. BMJ Open jurnalında dərc olunan tədqiqatda məşhur platformaların tibbi məsləhətlərində ciddi çatışmazlıqlar aşkar edilib.
QHT.az xarici mediaya istinadən bildirir ki, araşdırma çərçivəsində ChatGPT, Gemini, Grok, Meta AI və DeepSeek kimi sistemlərə xərçəng, peyvəndlər, qidalanma və idman performansı ilə bağlı 50 sual ünvanlanıb.
Nəticələrə görə, cavabların 20 faizi “çox problemli”, 50 faizi “problemli”, 30 faizi isə “qismən problemli” kimi qiymətləndirilib. Tədqiqatçılar həmçinin qeyd ediblər ki, təqdim olunan məlumatların bir hissəsinin elmi əsasları zəifdir və ya ümumiyyətlə yoxdur.
Araşdırma zamanı çatbotların təqdim etdiyi istinadlarda da ciddi problemlər aşkarlanıb. Bir çox hallarda səhv müəllif adları, işləməyən keçidlər və ya uydurma mənbələr qeydə alınıb. Platformalar arasında ən yüksək səhv göstəricisi Grok-da (58 faiz), daha sonra ChatGPT-də (52 faiz) və Meta AI-da (50 faiz) müşahidə edilib.
Tədqiqat göstərib ki, süni intellekt sistemləri qapalı tipli suallarda daha dəqiq nəticə versə də, açıq suallarda səhv ehtimalı artır. Xüsusilə gündəlik həyatda tez-tez verilən açıq sualların 32 faizində ciddi problemlər müəyyən edilib.
Mütəxəssislər bildirirlər ki, bu sistemlər real biliyə deyil, ehtimallara əsaslanaraq cavab formalaşdırır. Bu səbəbdən internetdəki ziddiyyətli və qeyri-dəqiq məlumatlar cavablara da təsir göstərə bilir.
Digər tərəfdən, Nature Medicine jurnalında dərc olunan başqa bir araşdırma göstərib ki, süni intellekt modelləri nəzəri olaraq yüksək dəqiqlik göstərə bilsə də, real istifadə zamanı düzgün nəticə əldə etmə faizi xeyli aşağı düşür.
Mütəxəssislər vurğulayır ki, süni intellekt vasitələri məlumat toplamaq və suallar hazırlamaq üçün faydalı olsa da, tibbi qərarlar üçün əsas mənbə kimi istifadə edilməməlidir. İstifadəçilərə belə məlumatları mütləq yoxlamaq və həkim məsləhətinə müraciət etmək tövsiyə olunur.
Piranə Xasiyeva
