Alyansın resursları, hava üstünlüyü və daxili birlik problemləri Rusiyanın istifadə edə biləcəyi risklər yaratdı...
Poliqon xəbər verir ki, Politico nəşrinin təhlilinə görə, ABŞ-nin İranla münaqişəyə cəlb olunması fonunda NATO-nun bir sıra sistemli zəiflikləri daha açıq şəkildə üzə çıxıb və bu vəziyyət Avropada ciddi narahatlıq doğurub. Məqalədə qeyd olunur ki, ABŞ və müttəfiqlərin diqqətinin Yaxın Şərqə yönəlməsi fonunda Avropada əsas sual getdikcə daha yüksək səslə səslənir: Alyans mümkün Rusiya hücumuna hazırdırmı?
Nəşr yazır ki, ilk ciddi problem raket və sursat çatışmazlığı ilə bağlıdır. ABŞ artıq Patriot sistemləri üçün ehtiyatlarının əhəmiyyətli hissəsini istifadə edib. Eyni zamanda Fransada Aster və MICA raketlərinin çatışmazlığı ilə bağlı xəbərdarlıqlar edilir. Ekspertlər hesab edir ki, genişmiqyaslı müharibə halında bu resurslar cəmi bir neçə həftə ərzində tükənə bilər.
Digər mühüm zəiflik hava üstünlüyünün təmin olunmaması ilə bağlıdır. Təhlildə vurğulanır ki, İran ABŞ aviasiyasının təzyiqinə baxmayaraq zərbələr endirməyə davam edib. Bu isə NATO-nun gələcək münaqişələrdə ənənəvi hava üstünlüyünə arxalana bilməyəcəyini göstərir. Alyansın daha çox uzaqmənzilli silahlara və yeni çəkindirmə strategiyalarına yönəlməli olduğu bildirilir.
Məqalədə dəniz qüvvələrinin hazırlıq səviyyəsi də tənqid olunur. Xüsusilə Böyük Britaniyaya məxsus HMS Dragon esminesinin texniki nasazlıq səbəbindən missiya öncəsi limana qaytarılması nümunə kimi göstərilir. Qeyd olunur ki, Rusiya ilə mümkün qarşıdurmada dənizlərə nəzarət və sualtı qayıqlara qarşı mübarizə həlledici rol oynayacaq.
Bununla yanaşı, NATO daxilində fikir ayrılıqları da ciddi risk kimi qiymətləndirilir. Avropa ölkələrində belə bir narahatlıq var ki, ABŞ Rusiya ilə yeni münaqişəyə tam miqyasda qoşulmaq istəməyə bilər və yalnız məhdud dəstək göstərməklə kifayətlənə bilər. Bu isə Alyansın kollektiv müdafiə prinsipinə dair suallar yaradır.
Nəhayət, nəşr vurğulayır ki, Ukraynanın rolu getdikcə daha kritik əhəmiyyət kəsb edir. Məqalədə qeyd olunur ki, Ukrayna müharibə şəraitində dronlara qarşı mübarizə təcrübəsi və müasir hərbi sənaye imkanları ilə artıq Avropanın təhlükəsizlik sisteminin ayrılmaz hissəsinə çevrilib.
Politico sonda xəbərdarlıq edir ki, NATO-nun bu problemləri aradan qaldırmaq üçün vaxtı sürətlə azalır və mövcud zəifliklər aradan qaldırılmasa, potensial rəqiblər bundan istifadə edə bilər.
Poliqon.info
