ain.az, Azertag portalına istinadən məlumat yayır.
Bakı, 29 aprel, AZƏRTAC
20 illik əmək fəaliyyətimə görə “Tərəqqi” medalı ilə təltif olunmağım mənim üçün həm böyük motivasiya, həm də ciddi məsuliyyətdir.
Bu fikirləri AZƏRTAC-a açıqlaması zamanı “Karvan L” MMC-nin icraçı direktoru, Azərbaycan–Afrika Ticarət Əlaqələri Assosiasiyasının təsisçisi və sədri Rəna Qəfərova deyib.
Onun sözlərinə görə, Azərbaycanda sahibkarlığa, xüsusilə qadın sahibkarlara göstərilən diqqət ildən-ilə artır. O əlavə edib ki, ölkədə sahibkarlığın inkişafı üçün əlverişli şərait mövcuddur.
“Bu məndə böyük məsuliyyət hissi yaradır ki, fəaliyyətimi daha da genişləndirim və işimi daha məsuliyyətlə davam etdirim. Son 5 ildə gömrük və vergi sahəsində aparılan islahatlar, vergi yoxlamalarının dayandırılması sahibkarlar üçün böyük dəstəkdir”, - deyə Rəna Qəfərova əlavə edib.
R.Qəfərova rəhbərlik etdiyi şirkət barədə də məlumat verib. Qeyd edib ki, “Karvan L” MMC yerli şirkət olaraq müxtəlif məhsulların istehsalı və ixracı ilə məşğuldur: “Hazırda məhsullarımız dünyanın 20 ölkəsinə ixrac olunur. Eyni zamanda, əsas fəaliyyət istiqamətlərimdən biri Azərbaycan məhsullarının Afrika bazarına çıxarılmasıdır”.
Müxbir - Kənan Fərzəliyev
Operator - Namiq Abdullayev
Sonrakı hadisələr barədə daha çox məlumat almaq üçün ain.az saytını izləyin.
