Gəminin sıradan çıxmasından sonra səkkiz gün dreyf edən qayıqda insan itkisi baş verib...
Poliqon xəbər verir ki, Aralıq dənizində mühərriki sıradan çıxan və uzun müddət nəzarətsiz şəkildə dreyf edən miqrant qayığında azı 17 nəfər həyatını itirib, 9 nəfər isə itkin düşmüş hesab olunur. Hadisə beynəlxalq miqrasiya marşrutlarından biri olan və Afrikadan Avropaya keçid üçün istifadə edilən dəniz yolunda qeydə alınıb.
Məlumata görə, gəmidə olan sərnişinlər təxminən səkkiz gün boyunca açıq dənizdə köməksiz vəziyyətdə qalıb. Sonradan xilasetmə əməliyyatı nəticəsində yalnız yeddi nəfərin sağ qaldığı müəyyən edilib. Onlar Liviya Qızıl Aypara Cəmiyyəti və yerli təhlükəsizlik qüvvələrinin iştirakı ilə ölkənin şərqində, Misir sərhədinə yaxın Tobruk şəhəri ərazisində xilas olunublar. Axtarış-xilasetmə əməliyyatları zamanı bir sıra cəsədlər tapılıb, lakin itkin düşənlərin də yaxın günlərdə dəniz axınları ilə sahilə çıxma ehtimalı yüksək qiymətləndirilir.
Liviya uzun illərdir Afrikadan Avropaya doğru hərəkət edən miqrantlar üçün əsas tranzit nöqtələrindən biri kimi qalır. Regionda davam edən münaqişələr, yoxsulluq və təhlükəsizlik problemləri səbəbindən minlərlə insan hər il bu təhlükəli marşrutla dəniz və səhra keçidinə cəhd edir.
Poliqon.info
