ain.az, Azertag portalına istinadən məlumatı açıqlayır.
Buxarest, 1 may, AZƏRTAC
Rumıniyanın “Financial Intelligence” nəşri Azərbaycan Dövlət Neft Şirkətinin (SOCAR) Rumıniyadakı fəaliyyəti ilə bağlı açıqlama yayıb.
AZƏRTAC xəbər verir ki, nəşr SOCAR-ın Rumıniyadakı törəmə şirkəti “SOCAR Petroleum SA” şirkətinin baş direktoru Ramin Əliyevə istinadən bildirir ki, şirkətin yanacaq ehtiyatları bazar tələbinə tam uyğundur və təchizatda hər hansı problem gözlənilmir.
Ramin Əliyevin sözlərinə görə, SOCAR-ın Rumıniyada fəaliyyət göstərən bütün yanacaqdoldurma məntəqələri normal rejimdə işləyir və təchizat zəncirində heç bir pozuntu qeydə alınmayıb. O qeyd edib ki, şirkət bazardakı vəziyyəti daim izləyir və tərəfdaşlarla sıx əməkdaşlıq edərək yanacaq təminatının davamlılığını təmin edir.
Nəşrdə bildirilir ki, SOCAR Rumıniyada 30-dan çox regionu əhatə edən 90-dan artıq yanacaqdoldurma stansiyasına malikdir və bu şəbəkə fasiləsiz fəaliyyət göstərir. Şirkətin yanacaq ehtiyatları Teiuş, Oneşti və Konstansa şəhərlərində yerləşən üç əsas depo vasitəsilə təmin olunur ki, bu da logistikanın sabitliyini təmin edən əsas infrastruktur hesab edilir.
SOCAR rəhbəri vurğulayıb ki, şirkət yanacaq təminatını müxtəlif mənbələr hesabına həyata keçirir. Bu mənbələrə həm beynəlxalq idxal, həm də yerli istehsalçılardan alınan məhsullar daxildir. Bu yanaşma təchizat zəncirinin çevikliyini və dayanıqlığını artırır, eyni zamanda yanacağın fasiləsiz mövcudluğunu təmin edir.
Məlumatda qeyd olunur ki, son günlər bəzi yanacaqdoldurma məntəqələrində məhsul çatışmazlığı ilə bağlı yayılan xəbərlərə baxmayaraq, şirkətdə belə hallar qeydə alınmayıb. SOCAR bütün müqavilə öhdəliklərini yerinə yetirdiyini və bazarda sabit fəaliyyətini davam etdirdiyini vurğulayır. Eyni zamanda qeyd edilir ki, Rumıniyada tətbiq olunan yeni tənzimləmələr fonunda yerli və idxal olunan dizel yanacağı arasında qiymət fərqləri yaranıb. Bu isə bazarda müəyyən kommersiya çətinliklərinə səbəb olsa da, ümumi yanacaq təminatında hər hansı çatışmazlıq müşahidə edilmir.
Qeyd olunur ki, SOCAR-ın Rumıniyadakı fəaliyyəti Azərbaycanın Avropadakı enerji iştirakının mühüm hissəsidir və şirkət regionda etibarlı təchizatçı kimi mövqeyini qoruyur.
İqbal Hacıyev
AZƏRTAC-ın xüsusi müxbiri
Buxarest
Hadisənin gedişatını izləmək üçün ain.az saytında ən son yeniliklərə baxın.
