İsrail ordusu Livanın cənubundakı Tir (Sur) bölgəsində gərginliyi artıraraq bir neçə yaşayış məntəqəsini ağır artilleriya atəşinə tutub.
Redaktor.az xəbər verir ki, hücumdan əvvəl İsrail tərəfi Livanın cənubundakı 12 şəhər və kəndin sakinlərini təcili təxliyəyə çağıran yeni xəbərdarlıq yayıb. Xəbərdarlıqdan qısa müddət sonra bölgəyə zərbələr endirilib.
Livanın Milli Xəbər Agentliyinin (NNA) məlumatına görə, İsrail artilleriyası Tir rayonunun Froun və Qanduriyə bələdiyyələrini, həmçinin əl-Mansuri, Qlailah və Məcdəl Zun təpələrini hədəf alıb. Bölgədəki hərbi aktivlik sakinlərin evlərini kütləvi şəkildə tərk etməsinə səbəb olub.
Qeyd edək ki, bu hücumlar aprelin ortalarında elan edilən kövrək atəşkəs rejiminin fonunda baş verir. Hər iki tərəf bir-birini razılaşmanı pozmaqda ittiham edir. Beynəlxalq monitorinq qrupları gərginliyin daha da genişlənməsindən narahatlığını ifadə ediblər.
Aminə ŞAHSUVARQIZI
